As investigacións inícianse no ano 2020 por mor dunha denuncia presentada na localidade de Villablino (León), por unha muller que fora vítima dunha ciberestafa coñecida polo “timo do amor”. A conta na que a vítima facía os seus ingresos pertencía a dúas mulleres nai e filla maiores de idade, nunha sucursal dunha entidade bancaria de Cambados, ante a sospeita que a vítima non sería a única estafada, comprobouse coa entidade bancaria o elevado número de movementos na citada conta, con multitude de ingresos aparentemente fraudulentos no último ano. Ante a confirmación das sospeitas que poderían indicar a existencia dunha posible fraude e branqueo de capitais, infórmase á entidade quen procede ao bloqueo da conta.
A investigación é asumida polo Equipo de Policía Xudicial da Garda Civil de Cambados (Pontevedra) que comproba o gran tráfico de transferencias entrantes e saíntes da conta que supera os 500.000 euros, polo que se procede ao bloqueo da mesma. Analizado o “modus operandi” da organización, determínase que funciona creando perfís falsos en varias plataformas da internet e distintas redes sociais, facéndose pasar por un “atractivo piloto” piloto de aeroliñas que contactaba con mulleres de mediana idade. Unha vez que se gañaba a súa confianza finxindo unha relación amorosa, aproveitaba a confianza adquirida para solicitarlles diñeiro con distintos fins, como atoparse nalgún país sen acceso á súa conta corrente persoal, polo que a transferencia debía realizarse á conta dun terceiro.
Noutras ocasións, o suposto piloto finxía que enviaba ás vítimas agasallos de alto valor económico (xoias, roupa, perfumes, etc) desde diferentes lugares no estranxeiro, facéndose pasar por traballadores de aduanas, aeroportos ou incluso transportistas, solicitando o pago dun diñeiro en concepto de “impostos” ou “aranceis” para a liberación do paquete e o envío ao seu domicilio. O diñeiro recibido na conta corrente utilizada pola organización, enviábase rapidamente (nalgunhas ocasións en minutos) a outras contas de terceiras persoas distribuídas por todo o territorio nacional e noutras ocasións ao estranxeiro, dificultando así o labor dos investigadores.
Con estes métodos, a organización foi capaz de estafar a máis de 150 persoas, utilizando un armazón de 18 contas correntes e máis de 50 liñas de teléfono, tanto nacionais como internacionais, para dificultar o seu rastrexo e identificación. Co peche da operación, esclarecéronse máis de 33 delitos distribuídos por todo o territorio nacional, puxéronse ao dispor da xustiza a 15 persoas nas provincias de Pontevedra, Sevilla, Madrid, Toledo, Málaga e Barcelona, de idades comprendidas entre os 28 e os 70 anos, e identificáronse a outras 7 persoas noutros países. O montante total das estafas denunciadas ascende a 94.887 euros. As dilixencias foron postas ao dispor do Xulgado de Instrución número DOUS de Cambados.
