Ribera Povisa repite un ano máis na clasificación dos 50 hospitais privados con mellor reputación de España. O hospital foi incluído no reputado informe Merco (Monitor Empresarial de Reputación Corporativa), que se elabora a partir dun diagnóstico global de hospitais e servizos clínicos.
O Monitor Empresarial de Reputación Corporativa está vixente desde o ano 2000 e converteuse nunha das ferramentas de referencia na medición da reputación corporativa das empresas que operan en España, tanto desde o punto de vista da opinión pública como das propias organizacións. Este recoñecemento é froito tanto do rigor na súa elaboración como do seu carácter integral.
O novo recoñecemento á calidade asistencial de Ribera Povisa prodúcese seis meses despois de recibir o premio ao hospital privado con mellor xestión de España, outorgado por New Medical Economics. O ano pasado, Ribera Povisa tamén foi distinguido como mellor centro sanitario privado de Galicia na IV Edición Premios á Sanidade, organizados por Redacción Médica.
Ademais dos galardóns polo seu labor no ámbito privado, o hospital vigués tamén atesoura recoñecementos no público, entre eles o de finalista dos premios NME na categoría de “Institución sanitaria con mellor colaboración público-privada”. Doutra banda, en 2020 converteuse no primeiro hospital galego certificado por AENOR polos seus protocolos fronte á COVID, acreditación que renovou cada trimestre.
Povisa alcanzou tamén un fito na historia dos hospitais galegos coa acreditación da Joint Commission en 2013 -foi o primeiro de Galicia en obtela e segue sendo o único-, froito do esforzo dos seus traballadores e dunha procura constante da excelencia. A consecución deste logro sumábase ao conseguido un ano antes, que o situou como o primeiro hospital de España en obter a Certificación Nacional de Seguridade Asistencial.
Ribera Povisa mantén unha constante aposta pola excelencia na calidade, sometendo cada protocolo do hospital a un proceso permanente e exhaustivo de análise. Desde o uso de medicamentos, dereitos do paciente e a súa familia, humanización dos procesos asistenciais, prevención de erros de medicación, ata a política antibiótica ou terapéutica. Un feito que se visibiliza na renovación continuada e consecutiva da acreditación JCI, coa que só contan 13 hospitais en España. Para iso, sométese cada 3 anos a unha minuciosa auditoría na que o equipo auditor mantén reunións con pacientes atendidos ou intervidos no hospital e durante a que se avalían máis de 13.000 parámetros.
