A 45º Regata de Primavera – Trofeo Repsol empezou a definir este sábado as súas clasificacións tras a celebración da primeira das tres xornadas de competición que se disputarán nas Rías Baixas ata o vindeiro luns baixo a organización do Monte Real Club de Yates de Baiona.
Nesta primeira etapa, o percorrido para os 50 barcos participantes foron as algo máis de 23 millas que separan a baía baionesa do interior da ría de Pontevedra, un trazado que os barcos máis rápidos completaron en case catro horas e media, nun día nubrado, con bruma, algún chuvasco puntual e un vento non demasiado intenso pero suficiente como para non estancar á frota.
Os barcos máis grandes, agrupados na clase ORC 1-2-3, foron os máis rápidos en completar as algo máis de 23 millas de percorrido entre Baiona e Combarro. O Magical do Real Club Náutico de Vigo, patroneado por Julio Rodríguez, cruzou a liña de chegada o primeiro tras 4 horas e 22 minutos de navegación. O Swan 42 logrou impoñerse en tempo real ao Yess Too de Rui Ramada (MRCYB) e o Aceites Abril dos irmáns Pérez Canal (RCN Vigo), ambos os dous Swan 45.
Os tres mantivéronse na cabeza da frota durante todo o percorrido, con diferentes estratexias e distintas eleccións de bordo pero con resultados moi similares. Por detrás deles, dous barcos máis pequenos, o Bon III de Víctor Carrión (CN Punta Lagoa) e o Sailway de Ramón Ojea (CM Canido) destacaron polo seu bo facer na regata. A pesar de ter menos eslora, non perderon de vista aos máis grandes en ningún momento e isto beneficioulles cando o comité de regata compensou os tempos, permitíndolles quedar segundo e terceiro respectivamente. O terceiro caixón do podio provisional ocúpao o Narval de José Antonio Portas (CN Vilagarcía).
Na clase ORC 4, unha das máis axustadas, onde gran parte da frota navegou sen lograr grandes marxes sobre os seus rivais máis directos, fíxose coa vitoria unha das tripulacións asiduas aos podios das competicións nas Rías Baixas, o Deep Blue de Vicente Cid (RCN Vigo). Logrou a vitoria da primeira etapa impoñéndose sobre La Burla Negra de Juan José Martínez (CN Castrelo de Miño) e o Unus de Luis García Trigo (MRCYB) que, a espera do que suceda os dous próximos días, ostentan a prata e o bronce provisionais.
A disputa de clase ORC 5 resolveuse co triunfo do Nahela, o barco guardés patroneado por Víctor Manuel Álvarez (CD Alagua). Dúas tripulacións da zona do Morrazo, a do Cinco Islas Albariño de Iñaki Carbajo (CN Beluso) e a do Balea Dous de Luis Pérez (RCN Rodeira) pelexarán por arrebatarlle a primeira posición desde o segundo e terceiro debido a que lograron este sábado.
Na clase A2, a parella formada por Jacobo Vecino e Brenda Maure, recentes gañadores do Trofeo CdeC na mesma categoría, volveron dar mostra das súas habilidades de navegación a catro mans, impoñéndose nesta primeira xornada co Salaño Dos, do Real Club Náutico de Vigo. Xunto a eles, só outro barco máis acabou a proba, o Aquilón de Roberto Telle e Genoveva Pereiro, do Monte Real Club de Yates.
Na clase J80, unha das noticias do día foi o regreso á competición, tras uns meses en stand by, do Okofen de Javier de la Gándara. Coa súa tripulación habitual, o patrón vigués demostrou non perder fol, poñéndollo moi complicado ao Alboroto de Javier Aguado, que partía como favorito. Ambos mantiveron un intenso man a man, moi pegados durante todo o percorrido e na cabeza da frota. Pero no último tramo, xa cara ao interior da ría de Pontevedra, o Solventis Ribadeo, de Manuel Jiménez, deu o sorpasso da xornada. Colleu un gran ritmo e adiantounos a todos, sacándolles cada vez máis e máis distancia. Acabou primeiro e levou a vitoria de etapa por diante do Alboroto e o Okofen, que quedaron segundo e terceiro respectivamente.
Esta primeira xornada da Regata de Primavera do Monte Real supuxo a estrea en competición do novo combustible de Repsol, 100% renovable e con cero emisións. As embarcacións de apoio do club baionés saíron á auga con este carburante elaborado a partir de residuos, co que a compañía enerxética busca reducir a pegada de carbono. Para o Monte Real foi a primeira proba dun combustible que o club espera poder usar no Mundial de J80 que organiza o próximo mes de setembro.
Antes diso, volverá usarse este domingo e o luns nas dúas xornadas que quedan por diante ao Trofeo Repsol. A etapa dominical supoñerá o regreso da frota a Baiona desde Combarro. A saída, se a meteoroloxía permíteo, darase ás doce do mediodía e os participantes terán por diante unhas 23 millas cun percorrido inverso ao da xornada inaugural. Pola tarde, unha vez finalizada a proba, as tripulacións poderán gozar dunha cea mariñeira nos xardíns do Monte Real antes da etapa final do luns.
