O brote epidémico do coronavirus que deu orixe ao COVID-19 produciu unha situación de gran sufrimento para a poboación, pero nas persoas que padecen enfermidade mental agravouse polo illamento que a propia enfermidade xera, cunha maior desconexión da realidade.
Isto súmase a que as persoas con trastornos de saúde mental previos, teñen un risco importante de recaídas, por iso o pasado 16 de marzo púxose en marcha un servizo de atención psicosocial telemática, atendido por psicólogos e educadores sociais cun carácter fundamentalmente proactivo, que permitiu unha detección precoz, valoración especializada de situacións de necesidade, achegando ferramentas para soportar a situación de alerta sanitaria.
Estes profesionais realizaron un apoio emocional, transmitindo proximidade e tranquilidade, ofrecendo pautas, acompañando a familias en situacións difíciles, en definitiva, facendo sentir ás persoas que contan cos apoios necesarios para afrontar estas situacións extraordinarias.
“Os nosos profesionais tiñan instrucións de chamar todos os días a cada un dos usuarios que participan nos nosos servizos” comenta Rafa Álvarez. “Se á poboación en xeral o confinamento xéralle moita ansiedade, nestas persoas o efecto é máis devastador. Por iso, o labor de apoio, de seguimento, de detectar calquera incidencia ou risco engadido, poder transmitilo e coordinarnos con outros recursos sanitarios, sociais, de psiquiatría, protección civil, foi fundamental”, declara o Xerente.
Nalgúns casos non aguantaron a rixidez das normas e o feito de estar encerrados, polo que esta situación supuxo unha bomba de reloxería…. Tivemos situacións de descompensación, tentando evitar a deterioración progresiva de bastantes casos, con numerosas intervencións en domicilios, explica o Xerente.
Todo este traballo deixa ao descuberto unha realidade precaria que a Entidade sufriu pola escaseza de medios, redobrando os seus esforzos e adaptándose a cada situación ante a dificultade engadida que supuxo esta situación excepcional.
“Partes de guerra”
Nun informe elaborado pola Asociación con datos recollidos a diario, destácase que no período do 16 de marzo ao 31 de maio, atendéronse de forma directa a 132 persoas e a 76 familiares e realizáronse 120 saídas terapéuticas.
As conversións (telefónicas, chats, videollamadas…) ascenderon a preto de 5.000, das cales, a media de cada chamada era de 20 minutos. A conversación máis longa chegou a 2 horas, 40 minutos cun usuario que vivía só.
Realizáronse ao redor de 11.500 actuacións, para dar apoio, informar, resolver dúbidas, buscar recursos, xestión de compra de alimentación, tabaco, supervisión da medicación, visitas presenciais, prestando especial atención a persoas que viven soas, que presentaron unha maior vulnerabilidade e as que contaban cun teléfono de garda permanente ao que podían chamar as 24 horas do día, os 7 días da semana.
Reapertura dos Centros a nivel presencial
Nestes momentos reinician a actividade presencial cos usuarios con todas as garantías sanitarias. “Toda precaución é pouca para garantir a seguridade de todos os que formamos Avelaíña” declara Rafa Álvarez, “por iso traballamos na elaboración de protocolos que permitan a reorganización dos programas e servizos para adaptarse ás novas circunstancias”.
O reinicio está a realizarse de forma paulatina combinando a atención presencial con chamadas periódicas para coñecer o seu estado e axudarlles cos problemas que lles poidan xurdir… centrados na xestión da nova normalidade, como o manexo de máscaras ou apoio emocional.
