O delegado do Goberno en Galicia, Javier Losada, informa de que esta mesma mañá o Executivo entregou preto de 60.000 test rápidos á Xunta, respondendo o compromiso do presidente, Pedro Sánchez.
En concreto, esta madrugada chegou á plataforma loxística do Sergas, no municipio de Negreira, un novo lote composto por 58.000 test rápidos e 39.000 máscaras, que se suman ás 117.000 unidades de máscaras que se depositaron onte domingo nas mesmas instalacións da Consellería de Sanidade.
Os 58.800 test rápidos entregados hoxe son un complemento ás PCR, que permitirá incrementar de forma substancial a capacidade de diagnóstico para confirmar ou descartar a presenza do COVID-19 na poboación.
Este novo envío de material, ao que seguirán outros nos próximos días, vai destinado á poboación con maior risco, especialmente para a súa distribución en hospitais e residencias de maiores.
A sensibilidade dos test que se están distribuíndo desde hoxe foi probada e validada polo Instituto de Saúde Carlos III.
Con esta última entrega, rexistrada esta madrugada, xa son 1.677.758 unidades de equipamento sanitario a Galicia para combater a pandemia do COVID-19. Javier Losada detallou que os envíos incluíron 687.762 luvas de nitrilo, 839.816 máscaras, 3.202 buzos, 3.064 batas desbotables e impermeables, 4.977 lentes de protección, 5.496 unidades de solución hidroalcohólica e 16.741 unidades doutro material como calzas, mandís, cubremangas e gorro.
O delegado do Goberno apuntou que estes responden o compromiso de colaboración do Executivo cos servizos sanitarios de Galicia e subliñou que, neste momento de crise sanitaria, a colaboración entre administracións é máis necesaria que nunca e destacou a coordinación entre o Goberno de España e a Xunta de Galicia na loita contra o inimigo común: o COVID-19.
