Baiona vivirá este sábado unha nova xornada de vela da man da Liga de Inverno Clase J80 do Monte Real Club de Yates. A partir das tres da tarde, os doce veleiros inscritos na competición de monotipos disputaranse tres novas regatas en augas da baía baionesa.
Farano cunhas condicións que se anuncian favorables para a navegación, xa que as previsións apuntan a unha nova xornada de sol, con temperaturas agradables e un vento do oeste que soprará cunha media de 8 nós de intensidade.
O comité de regata dará saída a tres probas barlovento sotavento nun campo que se definirá nos momentos previos á competición, pero que estará situado no interior da baía, visible para todos aqueles que queiran gozar da navegación dos veleiros desde a península do Monte Boi e as praias próximas.
Tras vencer nas tres xornadas previas, o Okofen de Javier de la Gándara é o barco que lidera a liga, afastado a 13 puntos dos seus rivais. O Miudo by Storax no que se alternaron na cana o portugués Rui Ramada e a súa filla Francisca Barros, vai segundo; e o Virazón de Miguel Lago, patroneado na última xornada por Javier Rey, ocupa a terceira posición.
