Mañá xoves, 17 de agosto, Francisco Ledo Lemos pon fin ao ciclo de conferencias organizadas pola Concellería de Cultura e coordinadas por Antonio Piñero. Ás 20:00 horas no Multiusos Mercado de Sabarís ofrecerá o seu relatorio “O primeiro home de Europa que falou de si mesmo. O poeta grego Hesíodo do século VIII A.C”.
Os baioneses, baionesas e visitantes puideron gozar os xoves de xullo e agosto no Multiusos Mercado de Sabarís dun total de cinco relatorios de temática variada e diversa que versaron sobre temas de actualidade e interese xeral como a saúde, a cultura, a historia, a literatura, etc. Estas conferencias, con relatores de recoñecido prestixio pertencentes a Universidades de todo o país, súmanse ás ofertadas na Programación Baiverán 2023 baixo o título “O Falar das Pedras” organizadas desde o Arquivo Histórico e Biblioteca Pública Municipal de Baiona, que continúan a súa andaina o vindeiro luns 21 de agosto.
