Máis de 400 nadadores participarán este domingo na XIII edición da travesía a nado Costa Serena-Gran Premio Concello de Nigrán, que reunirá en Praia América a nadadores de 7 comunidades autónomas (Galicia, Madrid, Cataluña, Castela-León, Asturias, Canarias e País Vasco), ademais de participantes de Brasil e Portugal, con idades comprendidas entre os 4 e 79 anos (Manuel Cruces Prado é o nadador máis veterano). Nesta edición, a participación das mulleres supera o 35% do total, a maior cifra de todas as edicións, e nadarán máis de 60 nenos con idades comprendidas entre os 4 e 13 anos nas probas infantís de 50 e 150 metros, tamén o maior rexistro ata a data. Tras doce edicións, a travesía a nado Costa Serena-Gran Premio Concello de Nigrán consolidouse como a proba de natación popular con maior participación de toda Galicia.
Entre os participantes figuran a campioa de Europa e do Mundo de paratriatlón, Susana Rodríguez Gacio, que acaba de recibir a Medalla Castelao da Xunta de Galicia polos seus méritos deportivos. A paratriatleta, que virá acompañada polo seu adestrador, Luis Piña, participará este sábado na Copa do Mundo de Paratriatlón que se disputará na Coruña, proba clasificatoria para os Xogos Paralímpicos de París 2024. Tamén acudirá o nadador brasileiro José Ferreira, que repite por segundo ano consecutivo, e ostenta o título de récord Guinness por ser o nadador máis rápido en percorrer a travesía máis longa de Brasil, Leme-Pongal-Leme, completando os 72 quilómetros en augas abertas en 26 horas e 32 minutos.
Entre os favoritos para gañar a proba raíña de 4.000 metros na categoría masculina están os nadadores Marcos Vila Cid, do Club Natación Pavillón de Ourense, gañador na pasada edición; David Rodríguez Lago, do Club Natación Ciudad de Santiago, segundo clasificado en 2022, e Roque Oca, que se impuxo en varias ocasións. Na categoría feminina, a nadadora viguesa Mónica Incera Filgueira, a baionesa Rita Hernández Alfageme, e a asturiana Ana Villanueva son as favoritas para gañar neste percorrido.
Durante a travesía, que estará coordinada pola Asociación Búsqueda y Salvamento de Galicia, despregarase un amplo dispositivo de seguridade formado por embarcacións de Protección Civil do Val Miñor e Vigo, Garda Civil do Mar, kaiaks do Club Marítimo de Panxón e pádel surf de Shafire Ladeira Beach Club, entre outros. Todos os participantes poderán gozar dun aperitivo (marmitako) ao finalizar a travesía no Club Marítimo de Panxón, grazas ao patrocinio de Atunlo, e ademais sortearanse máis de 40 agasallos entre os nadadores.
Percorridos
Na travesía disputaranse tres percorridos de 4.000, 2.700 e 800 metros, e o neopreno será optativo en todas as distancias. O percorrido longo consistirá nun triángulo de 4 quilómetros con saída desde a canle principal de saída e entrada das embarcacións de Praia América e chegada á altura do posto de Protección Civil de Panxón. Os nadadores deberán bordear a baliza de Cabezo de San Juan, regresar cara á costa polo lado sur da praia e percorrer o último quilómetro en paralelo ao areal.
O percorrido de 2.700 metros terá o mesmo punto de saída que a proba de 4.000 metros. Consistirá en ir ata o faro de Cabezo de San Juan, bordealo e regresar ao momento de meta polo lado dereito. Na proba de 800 metros, que se disputará en paralelo á costa, a saída estará situada tamén na canle principal de Praia América e a chegada será no mesmo punto que as probas de 4.000 e 2.700 metros. A competición de 4.000 metros comezará ás 11:30 horas, a de 2.700 metros ás 11:50 horas, mentres que a de 800 metros arrancará ás 12:00 horas.
Ademais, celebraranse dous percorridos de curta distancia de carácter non competitivo para nenos de entre 5 e 13 anos, moi preto da beira. Haberá unha distancia de 50 metros (5 e 8 anos) e outra de 150 metros (9 a 13 anos). Estas probas comezarán ás 13:00 horas (50 metros) e 13:30 horas (150 metros), respectivamente.
Premios
Nos tres percorridos entregaranse trofeos aos tres primeiros clasificados absolutos da categoría masculina e feminina, e nas distancias de 4.000 e 2.700 metros tamén aos tres primeiros/as que naden sen neopreno. Na proba raíña tamén se repartirán medallas aos tres primeiros clasificados/as das 12 categorías por idades. Ademais entregaranse premios especiais ao primeiro nigranés e nigranesa, que deberán estar censados no Concello de Nigrán no momento da inscrición, ao máis novo e de máis idade de todas as probas. Os nenos que participarán nos percorridos de 50 e 150 metros recibirán unha medalla.
A entrega de premios celebrarase o domingo a partir das 14:00 horas en Praia América, e contará coa asistencia do alcalde de Nigrán, Juan González; a concelleira de Deportes, Sara Penedo; o responsable e coordinador de xerencia do Centro Comercial Nasas Nigrán, Justiniano Diz; o responsable de exportación de Adegas Valmiñor, Erick García, e Lucía Pernas, en representación de Atunlo.
A zona de concentración dos nadadores será o domingo 2 de xullo nas instalacións deportivas de Dunas de Gaifar en Panxón, a partir das 09:00 horas, onde se entregarán as bolsas aos participantes. Tamén haberá repartición de dorsais o día anterior no mesmo punto en horario de 16:00 a 20:00 horas.
A travesía a nado Costa Serena, organizada polo Club deportivo Tumetapersonal, o Concello de Nigrán e Atlantic Extreme Sports, conta co patrocinio da Deputación de Pontevedra, Centro Comercial Nasas Nigrán, Supermercados Froiz, Renault Rodosa, Gadis, Centro Comercial da Ramallosa, Atunlo e o concesionario Ángel Leirós Motos. Tamén colaboran Powerade, Frutas Sol, Arena, Club Marítimo de Panxón, Shafire Ladeira, Prado Surf, Valmiñor Ébano, McDonald’s Rías Baixas, Protección Civil do Val Miñor e Vigo, Búsqueda y Salvamento Ría de Vigo, Asociación Vodea, Clubnatacion.com, Waira, Kailúa, Talaso Atlántico e Tupana.
