Queixas en Gondomar tras deixar o autobús a catro persoas “tiradas” en Vigo

Luns, día 26 de decembro de 2022. Cinco persoas agardan polo bus na parada das Travesas en Vigo para volver ás súas casas en Gondomar. Son as 21:00 horas da noite e como de costume non debería tardar moito en chegar o coche de liña. Pasan 15 minutos, pasa media hora, pasan 45 minutos e, por fin, ás 22:00 horas chega o bus á parada. Nas oficinas de Lugove ninguén colleu o teléfono para explicar que pasaba. Sóubose despois que seica foi por culpa dos atascos que provocan as luces de Vigo e polos cambios provocados pola nova estación de buses recentemente inaugurada.

Pero segundo denuncia Manifesto Miñor, isto non foi todo. Resulta que o micro-bus de Lugove viña cheo e das cinco persoas que agardaban na parada só puido subir unha quedando en terra as outras catro restantes, das que dúas eran raparigas menores de idade. “Ao final o problema resolvérono os pais e os familiares indo a Vigo a recoller aos malogrados viaxeiros. Eu pregunto, de verdade é así como pensan facer útil e atractivo para os usuarios un servizo público de viaxeiros? De verdade os nosos gobernantes están interesados na famosa descarbonización e que os cidadáns deixemos os coches na casa?”, pregúntase Antonio Araújo.

Manifesto Miñor esixe que dende a Xunta de Galicia se corrixan estes problemas canto antes, “pois non é a primeira vez que acontecen”.