Novo asalto da Liga de Outono Gestilar J80 este sábado en Baiona. O campionato de monotipos outonal do Monte Real Club de Yates celebra a súa segunda xornada co Alboroto de Juan Carlos Ameneiro liderando a táboa.
O actual campión de España da clase vai na cabeza da competición cuns parciais perfectos de 1-1-1, tras vencer cun pleno de vitorias nas tres probas disputadas na xornada inaugural.
Para esta segunda etapa, o programa ten prevista a disputa doutras tres regatas, e se as condicións permiten a súa celebración, as máis de vinte tripulacións da liguiña de J80, terán ocasión de realizar o seu primeiro descarte.
Esa posibilidade de eliminar o peor resultado da táboa axustará, seguro, aínda máis a clasificación, e obrigará á frota a tratar de esquivar calquera erro, por mínimo que sexa, nas seguintes xornadas. Nun circuíto de 5 etapas, con 15 mangas e só 2 descartes, calquera fallo pode resultar moi caro para os equipos.
Á espera de ver o que sucederá este sábado, no que a meteoroloxía anuncia boas condicións para a navegación (ventos de compoñente sur con 7 nós de media e picos de ata 12) os tres barcos que van na cabeza son o Alboroto de Juan Carlos Ameneiro (MRCYB), o Bica de Chisco Catalán (MRCYB) e o I3D Atlántico de Guillermo Blanco (RCN A Coruña).
Outros dous barcos do club organizador, o Cansino de Fernando Yáñez e o Solventis Ribadeo de Andrés Álvarez, tratarán de asaltar o podio provisional desde a cuarta e quinta posición.
