A Garda Civil investiga penalmente a un mozo de O Morrazo que supostamente utilizou a identidade doutra persoa para adquirir ilegalmente un determinado medicamento. O fármaco en cuestión contén o principio activo que ao mesturalo con alcol e haxix convértese nunha sustancia estupefaciente coñecida como Karkubi ou a “droga dos pobres”.
As investigacións realizadas polo Equipo de Investigación do Posto Principal da Garda Civil de Cangas iniciáronse cando un veciño do municipio, que tiña prescrito o mesmo medicamento, recibe información de que unha terceira persoa comprara recentemente este fármaco usurpando a súa identidade, dándose a circunstancia de que o denunciante extraviara recentemente un tarxeteiro que contiña o D.N.I., e a Tarxeta Sanitaria do Sergas.
As pescudas concluíron coa identificación dun mozo de 17 anos, tamén veciño da comarca de O Morrazo que segundo se puido comprobar conseguiu que lle dispensasen o medicamento, polo menos en dúas farmacias da comarca.
O menor foi notificado en presenza dos seus pais, como presunto autor dun delito de usurpación de identidade. As dilixencias instruídas entregáronse no Xulgado de Instrución de garda de Cangas e na Fiscalía de Menores.
