Desde fai aproximadamente dez anos o sector resineiro a pé de monte comezou a sufrir un tímido repunte por parte de persoas experimentadas que por un motivo ou outro retomaron a actividade, pero tamén por xente nova que atopa aquí un aproveitamento que lles permite gañarse a vida. Grazas á aplicación de novos métodos de extracción que son moi superiores aos tradicionais en canto a rendemento refírese, ábrense as portas a unha nova forma de aproveitamento forestal. Precisamente nos montes de Oia, unha empresa local que presenta servizos a comunidades de montes sérvese dunha técnica novidosa e moi pouco intrusiva para extraer resina de 22.000 árbores distribuídas por Mougás, San Miguel de Tabagón e Eiras e en breve dará o salto aos montes do Val Miñor, en concreto en Gondomar.
“O sistema de pica circular mecanizada” tan só se replica en Estremadura e Castela e León. Eduardo González, de 42 anos de idade, da empresa Laxes Ambiental SL, defende que este método é moito máis coidadoso que o sistema clásico de grampas e permite á súa vez aumentar considerablemente a produción, ademais permite unha cicatrización maior unha vez retíranse. Mediante un trade de batería faise un buraco cunha broca oca de 60 mm coa que se extrae a cortiza e o cambium, ou segunda capa superficial, pero sen entrar na madeira, a continuación, bótase a pasta estimulante e colócase un implante plástico circular encostado a unha bolsa que é practicamente hermética.
Segundo asegura, as perdas de material con este novo sistema son moi poucas, obtense un material de moita calidade e sen auga permitindo así aproveitamento moi importante das zonas forestais, algo que está a chamar a atención de moitas comunidades de montes da zona, como a de Vincios ou Couso, que xa puxeron en marcha catas experimentais nos seus montes e que a partir do próximo ano implantaranas no Val Miñor con diferentes modelos de xestión a través desta entidade. O administrador de Laxes asegura que co tempo o seu valor aumentará ao tratarse dunha resina premium. “É como comparar ferros de aglomerado con madeira maciza”, aclara.
A Comunidade de Montes en Man Común de Couso xa ten contemplado no seu proxecto de ordenación o aproveitamento resineiro, para o ano que vén comezará a actividade coa contratación de dúas persoas. A de Vincios, pola contra, contempla cederlles a actividade a cambio de que manteñan as súas extensións forestais libres de maleza para previr incendios, algo que desde a empresa veno completamente asumible.
