Baiona prepárase para celebrar a 37ª edición da Carreira Pedestre Popular “Andar e Correr”, a gran cita deportiva do ano. A proba organizada pola Concellería de Deportes disputarase o domingo 21 de agosto, un evento imprescindible que se consolidou no calendario de carreiras populares. Unha carreira que terá como epicentro de saída das distintas categorías o Parque da Palma e que no seu percorrido máis longo de 10 quilómetros transcorre polo Camiño Portugués pola Costa. Os atletas pasarán por monumentos emblemáticos como o Cruceiro da Santísima Trindade, Santa Liberata, subida de San Antón, miradoiro de Baredo, regresando polo Rompeolas ao emblemático parque baionés.
O Concello de Baiona, a través da Xefatura da Policía Local, deseñou un plan especial de tráfico para este día. Procederase ao corte puntual da circulación do tráfico na PO-552 no momento da saída da carreira, prevista ás 11:00 horas, dando cobertura de forma dinámica na seguridade viaria ao seu paso polo Casco Histórico da Vila, Santa Liberata, Covaterreña, San Antón e Baredo. Unha vez transcorrido o percorrido por Baredo, os corredores e corredoras incorporaranse á PO-552 ao carril bici á altura da rotonda de Rocamar, habilitado para tal fin.
Ante os cortes puntuais de circulación que se realizarán ao paso da popular carreira, recoméndase que os accesos ao centro urbano efectúense utilizando a circunvalación, que conecta directamente a zona de Sabarís con Baredo ou a rotonda do Villa Rosa. O Alcalde, Carlos Gómez Prado, sinala que “desde o Concello de Baiona pedimos prudencia á hora de circular pola zona e pedimos desculpas ás persoas afectadas polas molestias que este evento poida ocasionar, pois atraerá ata o municipio a un gran número de participantes e persoas, xa que regresa con máis forza que nunca despois de dous anos de pandemia”.
