1ª Andaina por un paseo fluvial entre Gondomar e A Ramallosa

A 1ª Andaina a favor dun paseo fluvial dende Gondomar ata A Ramallosa pola beira do río Miñor desenvolverase o vindeiro 19 de xuño ás 11:00 horas dende o antigo Matadoiro de Gondomar ata a ponte da Xunqueira.

De sempre, aqueles proxectos ou obras que perduraron no tempo son os que axudaron a cambiar, para ben, a vida das persoas que viven nas vilas, cidades, etc. Un exemplo disto sería a construción dun paseo fluvial entre a Vila de Gondomar e A Ramallosa, un proxecto demandado pola veciñanza de Gondomar e de todo o Val de Miñor dende hai máis de 30 anos, cando se construíron os paseos que van pola costa entre Baiona e Panxón. “A torpeza e a desidia dos gobernantes, tanto municipais coma galegos, fixo que esta necesidade non se puxese enriba da mesa até o período 2007-2009, cando chegou á Alcaldía de Gondomar Antonio Araújo, quen redactou e tramitou un proxecto de paseo fluvial pola beira do Río Miñor, e que a moción de censura de 2009 frustrou até o día de hoxe”, lembran desde Manifesto Miñor.

“Agora que os gobernos municipais da comarca, da Deputación, do Estado, da Xunta, etc., non fan máis que pregoar e falar de economía verde e sustentable, de redución de CO2, de camiñar ou andar en bici, en bus, etc., chegou a hora de lle esixir que se mollen e cumpran coa súa obriga de escoitar a demanda da cidadanía neste asunto e, sobre todo, o SOS do Planeta e a loita contra o cambio climático”, sinala Antonio Araújo.

En Manifesto Miñor, forma parte do seu ideario fundacional e dos seus principios a máxima de “PENSAR GLOBALMENTE E ACTUAR LOCALMENTE”. “Cremos que é o momento de tomar exemplo de modelos que se están a desenvolver por todo o país e, por iso, chamamos a participar a toda a veciñanza do Val de Miñor na 1ª Andaina pola beira do Río Miñor para reivindicar un paseo fluvial. Porque é bo para a nosa saúde, para o coñecemento e a conservación dun espazo privilexiado, para a economía da comarca en xeral e de Gondomar en particular polo feito de conectar a Vila cos paseos da costa e, obviamente, por que é bo para o Planeta”, engade Araújo.

Trátase dunha andaina de aproximadamente hora e media de duración e dificultade baixa e apta para todos os públicos. Só cómpre levar roupa e calzado axeitados e cos ollos ben abertos e en disposición de coñecer a fauna e a flora sorprendentes que van descubrir da man de especialistas, así como o estado de abandono de moitos tramos do río. Ao remate da andaina, para quen queira, haberá unha sesión vermú no Bar Fontán en Borreiros.