A Garda Civil de Pontevedra identificou aos integrantes dunha organización delituosa dedicada a cometer estafas bancarias a través de Internet, cuxa investigación se orixinou tras a denuncia dunha empresa da provincia. Como resultado da denominada operación “Marware”, que levou a cabo a Unidade Orgánica de Policía Xudicial da Comandancia de Pontevedra, investigouse a 21 persoas en Madrid, 3 en Toledo, 4 en Ourense e 4 en Portugal, acusadas como presuntas autoras de delitos de estafa e pertenza a organización criminal.
Os implicados, a través dun software malicioso instalado no computador da vítima, conseguían desviar ás súas contas importantes cantidades de diñeiro. O procedemento iniciábano cunha campaña de captación, enviando a distintas empresas correos “phishing”, suplantando a unha entidade bancaria. Unha vez lograda a infección do computador da vítima coa instalación do software malicioso, permitíalles o rexistro das claves bancarias das contas utilizadas na actividade comercial.
Tras este paso, o grupo criminal, valéndose dunha base de contas bancarias obtidas previamente das súas “mulas económicas”, xestionaba as ordes de transferencias, preferentemente no ámbito nacional, aínda que tamén se realizaron transferencias internacionais, fundamentalmente con Portugal e Reino Unido.
Durante a investigación comprobouse como en cuestión de poucas horas os autores baleiraron as contas pertencentes á empresa, valéndose dun tipo software malicioso “malware” que lles permitiu acceder en remoto ao computador da empresa e rexistrar as claves bancarias, que lles facilitou executar posteriormente a estafa bancaria.
A pesar de que os principais responsables do grupo criminal asentábanse en Madrid, onde foron investigadas 21 persoas, tamén foron identificados outros integrantes da organización nas provincias de Toledo, Ourense e en Portugal. En total investigáronse 32 persoas, entre os que figura o responsable de recrutar ás “mulas económicas”, que é unha das pezas fundamentais do armazón delituoso, ao ser os encargados de facilitar as súas contas bancarias á organización para retirar o diñeiro.
No marco da mesma operación detectáronse outras dúas estafas en senllas empresas situadas en Cantabria e Ceuta, polo que o montante supera os 120.000 euros. A investigación foi tutelada polo Xulgado de 1ª Instancia e Instrución nº 1 de Cambados.
A GARDA CIVIL ACONSELLA:
Para evitar ser vítima de phishing/malware informático:
- Nunca abrir ou executar arquivos recibidos se temos dúbida da súa procedencia.
- Ter actualizado o noso equipo e o noso software antivirus. Un malware aproveita as vulnerabilidades do noso equipo.
- Como PEMES (empresa-autónomo) aconséllase tomarse en serio a seguridade informática do teu negocio, acudindo a expertos consultores e en mantemento informáticos que che axudarán a evitar as vulnerabilidades e a seguir boas prácticas coas que evitar ser vítima de tales estafas bancarias.
- Fundamental comprobar a dirección do remitente, aínda que no encabezado figure o nome da nosa entidade bancaria, se despregamos a dirección do remitente comprobaremos que non se corresponde co corporativo da empresa, devanditos grupos delituosos utilizan os servizos web gratuítos (Gmail, Yahoo!, Hotmail, etc.).
- Non facilites as túas claves de banca en liña ou os detalles da túa tarxeta (número PIN) ou contas bancarias.
- Ante todo, actuar con SENTIDO COMÚN.
Para evitar ser “mula económica” (colaborador do delito):
- Se alguén che pide transferir diñeiro (en liña ou efectivo) recibíndoo dunha terceira persoa e entregarllo a outra, cobrando unha comisión, entón estache pedindo ser unha “mula económica”. É un delito de branqueo de capitais e ten consecuencias penais.
- Parece unha maneira fácil de gañar diñeiro sen risco aparente.
- Xustificándoo de diferentes maneiras os “reclutadores” pediranche un número de conta ou que crees unha nova.
- Estarás a axudar ás redes delituosas a mover anonimamente fondos ilegais dun país a outro.
- Desconfía de ofertas de traballo, que prometen gañar grandes cantidades de diñeiro fácil, solicitando os teus datos bancarios. Se parece demasiado bo para ser certo DESCONFÍA!
