A edición da Copa Galicia de Ciclocrós marcada pola covid, cun calendario reducido e con estritos protocolos, pechouse este domingo na localidade ourensá de Maceda con quince gañadores finais. A diferenza do acontecido o día anterior no Porriño, o barro non xogou un papel determinante no XIII Ciclocrós Castelo de Maceda – Copa Deputación de Ourense.
Os irmáns Buba de Gondomar, do Club Ciclista Coruxo, conseguiron subir ao podio nas súas respectivas categorías. Danny Jan foi terceiro en cadete, cun total de 490 puntos. Héctor García, do Poio Bike Club, foi segundo con 540 puntos, e André Martínez recibiu o maillot de líder do certame autonómico con 750 puntos. Pola súa banda, Ricardo Martín foi segundo en júnior, con 485 puntos, seguido de Zoe del Río, do Club Ciclista XSM, en terceiro lugar, con 440 puntos. Miguel Rodríguez, do Club Ciclista Ponteareas, proclamouse campión da categoría con 600 puntos.
Nun mes celebráronse cinco citas (Marín, Sanxenxo, Santiago de Compostela, O Porriño e Maceda), todas elas sen público. O ciclocrós autonómico despedirá a súa tempada 2020 coa disputa do Campionato de Galicia o vindeiro domingo en Ferrol.
