A Garda Civil investiga penalmente a un veciño de Vigo, de 79 anos, ao que se lle atribúe o intercambio comercial dunha obra pictórica atribuída falsamente a un pintor profesional da mesma comarca. O cadro recuperouse nun establecemento de compra venda de obxectos usados no municipio de Mos, onde o entregaba como medio de cambio.
As investigacións iniciáronse cando un coñecido pintor da zona denuncia ante a Garda Civil que se ofrecía, por 1.600 euros, un cadro supostamente asinado por el, nun coñecido portal da internet de venda de artigos de segunda man. O pintor recoñece na súa denuncia que o cadro non é seu e admite o intento de imitación da súa firma.
As pescudas realizadas polos efectivos do Posto Principal da Garda Civil de Baiona-Nigrán permitiron pescudar a identidade da persoa que inserira o anuncio na internet, que resultou ser o dono dun establecemento do municipio de Nigrán que se dedica tamén á compravenda de obxectos usados.
Na súa manifestación, o propietario do local de Nigrán entregou á Garda Civil o cadro que tiña nun almacén de Mos e alegou que o recibía de mans dunha terceira persoa, como medio de pago, a cambio doutros obxectos que lle entregaba. Esta persoa foi a que supostamente lle informou da falsa autoría da obra.
Trátase dun veciño de Vigo, de 79 anos, que foi notificado en calidade de investigado como suposto autor dun delito contra a propiedade intelectual. As dilixencias instruídas e o cadro intervido entregaranse no Xulgado de Instrución de garda dos de Vigo.
A investigación concluíu coa denuncia do dono da tenda de Nigrán por unha serie de irregularidades administrativas derivadas do reiterado incumprimento da normativa que regula este tipo de establecementos dedicados á compravenda de obxectos de coleccionismo e de segunda man.
