Alumnos da escola de música de Vincios participan nun campamento musical en Mondariz

Máis de 120 alumnos das escolas de música das bandas de Candeán, Goián e Vincios desfrutan estes días en Mondariz do II Encontro Musical de Escolas de Bandas de Música.

Para este encontro, as tres escolas de música encargaron en exclusiva unha obra ao compositor galego Andrés Álvarez que escribiu Escarlatina, a cociñeira defunta . A peza está inspirada no libro homónimo de Ledicia Costas, premiado co premio Merlín de literatura infantil en 2014 e o premio nacional de literatura infantil en 2015. Segundo o compositor, a obra ilustra as personaxes da historia a través dos diferentes instrumentos da banda, nunha composición cargada de ritmo, enerxía e nostalxia.

Durante os tres días de convivencia que os nenos desfrutarán en Mondariz, realizarán diversas actividades musicais e lúdicas e contarán cunha conferencia por parte do compositor Andrés Álvarez que lles falará do proceso de creación musical e tamén coa presenza e conversa de Ledicia Costas, autora do nomeado libro.

O encontro rematará cun concerto o venres 29 ás 20:00 horas no Campo da Feira de Covelo onde unha gran banda formada por todos os alumnos participantes ofrecerá un concerto no que se estreará mundialmente Escarlatina, a cociñeira defunta.

A actividade está apoiada pola Deputación de Pontevedra e polo concello de Covelo.

2018-06-27 - 36223496_1871552352912621_7546575534155628544_o

Anuncios