Os usuarios do Juan María reciben os diplomas do seminario de educación viaria

Usuarios do Centro de Educación Especial Juan María recibiron este martes os diplomas acreditativos de asistencia ás xornadas de educación viaria 2017/2018 impartidas pola Policía Local de Nigrán coa colaboración da Dirección Xeral de Tráfico (DXT).

O centenar de usuarios deste centro acudiron ás clases teóricas e prácticas levadas a cabo no mes de maio empregando karts eléctricos da DXT, co apoio tamén da Asociación DisCamino, que prestou os seus triciclos e bicicletas adaptadas, e o GES, que mostrou os diferentes vehículos de emerxencia (como o camión de bombeiros). Os axentes ensínanlles a interpretar os seus sinais, os luminosos, verticais e horizontais. Tamén lles indican como colocarse na bici, como facerse visibles ou a obrigatoriedade do casco para menores de 16 anos.

Como en cada curso escolar, os centros educativos de Nigrán beneficiáronse ao longo do mes de maio de clases teóricas e prácticas completamente coordinadas, deseñadas e impartidas desde a Policía Local coa colaboración de DXT, que cede os recursos para un circuíto. Mantense así un traballo que este corpo iniciou no curso 2013/2014 impulsado polo propio inspector xefe José Manuel Vázquez á súa chegada ao municipio (anteriormente facíao a DXT co apoio dos axentes locais).

Anuncios