Anuncios
Ticker de novas

Abel Núñez, do IES Proval de Nigrán ao CERN en Xenebra

Un alumno do IES Escolas Proval de Nigrán traballará na Organización Europea para a Investigación Nuclear, máis coñecida como CERN, tras ser seleccionado polo seu programa de recrutamento. Comezará en agosto e o seu contrato de traballo por un ano prorrogable inclúe formación e idiomas. Trátase dun privilexio ao alcance duns poucos que lle permitirá ampliar o seu currículo de maneira exponencial, relacionarse cos científicos máis brillantes do sector e mesmo observar en primeira persoa o funcionamento da maior máquina creada polo ser humano para comprender de onde procedemos, o acelerador de partículas. Un feito polo que ata o mesmísimo Sheldon Cooper na serie de ficción “Big Bang” morrería por presenciar.

Abel Núñez Baqueiro é un mozo de 24 anos natural de Aldán e cuxas inquietudes fixeron que acabase no centro educativo nigranés. Sempre sentiu gran inclinación pola tecnoloxía aínda que de entrada non se dedicou a iso profesionalmente, segundo explicou a este diario xamais se imaxinou que acabaría na situación na que se atopa. E é que a súa vida deu un xiro de 180 graos tras ser aceptado no maior laboratorio de investigación de física de partículas do mundo. Estudou un ciclo superior de electricidade, sector no que estivo a traballar durante dous anos ata que decidiu retomar os seus estudos xa que os labores que desempeñaba non lle proporcionaban unha satisfacción plena como para seguir. Unha vez deixou o emprego matriculouse nun ciclo superior de sistemas electromecánicos automatizados e máis tarde levou a cabo outro de mantementos electromecánicos. Este último cursado en Proval foi o que lle abriu as portas ao seu maior desafío que segundo asegurou non foi cousa del. “A verdade que unha vez que acabei estiven a buscar opcións para facer prácticas fóra de España, nese momento e ao non atopar nada que me convencese, a miña profesora expúxome inscribirme no programa de recrutamento do CERN e aquí estou”, explicou. Nun principio botáballe para atrás irse fóra tanto tempo, pero grazas aos consellos dos seus profesores e amigos tirouse á piscina aínda que confesou que tamén o fixo ao considerar a súa selección pouco probable, aínda que finalmente non foi así. Superados os seus medos na actualidade xa baralla a posibilidade de quedar a traballar definitivamente nas instalacións internacionais.

En canto a que papel vai desempeñar no CERN Núñez explicou que non o ten moi claro xa que desde a organización o mutismo e discreción son practicamente absolutos ata o punto de asinar un contrato de confidencialidade. “Penso que nun principio farei un pouco de todo e a medida que vaian vendo no que teño máis afinidade, daranme un posto máis específico”, explicou. Aínda así as indicacións recibidas lévanlle a pensar que o seu labor estará relacionado cos departamentos de desenvolvemento de novas tecnoloxías de campos sen carga, investigación e desenvolvemento de sistemas de seguridade, e soporte de hardware e software.

O CERN e a estrutura do universo

O CERN foi fundado en 1954 por 12 países europeos e a grandes liñas o seu labor é investigar a estrutura do universo. Válense das máquinas máis complexas do mundo para estudar os compoñentes básicos da materia, as partículas fundamentais. Para iso fan que choquen a gran velocidade para estudar os efectos que se producen nelas e desta maneira obteñen información sobre as leis fundamentais da natureza. Foi unha das primeiras empresas conxuntas de Europa e na actualidade conta con 22 estados membros. Atópase situado na fronteira franco-suíza, moi preto de Xenebra.

Anuncios