Aproveitando a visita da conselleira de Infraestruturas e Vivenda, Ethel Vázquez, este venres ás obras de construción da nova senda peonil e ciclista na PO-340, os medios de comunicación aproveitaron para preguntarlle á representante autonómica pola incorporación de Gondomar ao transporte metropolitano.
Vázquez Mourelle remitiuse ao dito o pasado 12 de abril, sinalando de novo que o actual alcalde de Gondomar, Paco Ferreira, votou dúas veces en contra da incorporación ao plan en pleno municipal. Con todo, garantiu que se abordará a súa integración cos mesmos criterios cos que a dos 25 municipios que a teñen solicitada.
“Á Xunta de Galicia gustaríalle moitísimo que Gondomar incorporásese ao transporte metropolitano e o certo é que desde o ano 2015 fixemos de todo para conseguilo. Os responsables municipais deben revisar o que votaron. Mentres uns votaban en contra outros solicitaban de forma firme a incorporación. Por tanto temos que actuar dunha forma global, con criterios de igualdade e equidade para a incorporación de todos os concellos que o solicitaron. Quen foi a Sevilla perdeu a cadeira”, sentenciou a conselleira.
Ethel Vázquez lembrou que o alcalde pensaba doutra maneira cando estaba na oposición “e eu entendo que é moi difícil seguir co mesmo criterio pero en política creo que hai que ser coherente, e insisto, foi el persoalmente o que votou en contra da incorporación e agora si que a solicita. Entendemos que hai demanda pero igual demanda ou máis noutros concellos que tamén están agora mesmo antes que Gondomar, que perdeu a súa quenda, para incorporarse ao plan de transporte metropolitano. A nós gustaríanos incorporar a todos canto antes”.
Ante estas declaracións, Ferreira considera que se trata dunha “vinganza con Gondomar e os seus veciños”. O alcalde afirma que as administracións non deben actuar por impulsos nin vinganzas partidistas, e pregúntase por que non se convocou a Gondomar á Comisión de seguimento da Área de Transporte Metropolitano celebrada o pasado 2 maio, “por vinganza e despeito?”.
“Por que insisten en que entre Vigo, e Gondomar, que leva pedindo a súa entrada non a deixan. Son moitas as incógnitas e incongruencias, pero non nos daremos por satisfeitos e seguiremos loitando, a pesar de ser enganados e ignorados por quen debese estar á altura das circunstancias sociais, e non o está”, sentenza Ferreira.
Desafortunadas declaracións
O tenente de alcalde, Antonio Araújo, tamén se pronunciou tras as que considera unhas “desafortunadas declaracións”. O concelleiro de Manifesto Miñor sinala que ademais de impropias dunha representante do goberno de Galicia, “son unha falta de respecto a todos os veciños de Gondomar (incluídas as persoas votantes do PP), que non merecemos semellante trato”.
Para Araújo, a admisión desoutros concellos non é unha cuestión de quenda, xa que na área de Vigo só está pendente de entrar Gondomar, “e depende exclusivamente da vontade política da conselleira”. Lembra ademais que o rexeitamento maioritario da Corporación Municipal á proposta feita no 2015 polo PP, tivo basicamente cunha razón: “a proposta da Xunta non resolvía en absoluto a situación terceiromundista do transporte que temos en Gondomar”.
“No canto de facer comentarios simpáticos sobre un problema tan grave, a conselleira debería obviamente axudar a resolvelo, pois somos máis de 16.000 veciños e veciñas que o padecemos en Gondomar”, conclúe Araújo.
