Anuncios
Ticker de novas

A gondomareña Iria Misa publica a súa segunda novela

FOTO: XERAIS // Iria Misa co primeiro premio “Jules Vernes” 2016 de Literatura Xuvenil.

Iria Misa, natural de Gondomar e veciña de Baiona, vén de publicar a súa segunda novela, “Segredos no Solpor”, da colección Fóra de Xogo da Editorial Xerais. Trátase dunha engaiolante novela de intriga sobre a forza dos sentimentos, a melancolía dos erros pasados e as violencias visibles, e tamén invisibles, que sofren as mulleres.

En Bico durante os meses de vacacións todas as noites son de festa, mais o día que Lucía Xesta aparece tirada na estrada en fronte do Hotel O Solpor o verán semella quedar en paréntese. Algún coche que saíu da rotonda a máis velocidade da debida levouna por diante, e o condutor, ao parecer, deuse á fuga.

A Mara que atropelasen a súa compañeira Lucía ás seis e media da mañá fronte ao paso de peóns situado diante do hotel dos seus pais, xusto aquel día, pareceulle unha broma pesada. Outro máis dos enigmas incrustados nas paredes do antigo edificio, baixo as vellas fotografías de Bico que decoran os cuartos e os corredores.

A chegada de Antón e os seus pais, xunto coa aparición dunha nota entre os libros do tío Paco, axudaranlle a comprender os segredos que garda o hotel e a desvelar as razóns de tan estraño atropelo.

A primeira novela de Iria Misa, “Xa non estou aquí”, obtivo o primeiro premio “Jules Vernes” 2016 de Literatura Xuvenil, da Editorial Xerais.

Anuncios