Anuncios
Ticker de novas

Tráfico intensifica a vixilancia na estrada que une Gondomar e O Porriño

FOTO: DGT

Durante os días 31 de xaneiro e 1 de febreiro actual, levouse a cabo unha intensificación da vixilancia na estrada PO-331 que une as localidades do Porriño e Gondomar. Concretamente, as accións realizáronse entre os quilómetros 1,100 e 14,600, considerado “tramo de risco” por soportar durante o pasado ano 2 accidentes mortais e outros 5 de consecuencias graves.

O obxecto da intensificación da vixilancia por parte dos efectivos da Agrupación de Tráfico da Garda Civil nestes tramos é múltiple, destacando tres eixos fundamentais: o primeiro, reforzar a prevención e control sobre tramos da rede viaria con sinistros viarios coa consecuencia máis grave, o falecemento dunha persoa; o segundo, detectar a presenza de posibles infractores cuxa conduta inflúa determinantemente na seguridade do resto dos usuarios da vía e, finalmente, trasladar ao cidadán a idea de que a utilización de vehículos a motor nas vías públicas esixe unha condución responsable, adecuándose sempre ao cumprimento das normas. Sendo o factor humano determinante nunha inmensa maioría dos accidentes de tráfico.

A prevención específica neste tipo de tramos viarios consiste na intensificación dos controis de velocidade e alcol/drogas, na vixilancia do uso de elementos de seguridade e das distraccións na condución (en especial o uso de dispositivos móbiles) e tamén na concienciación dos colectivos vulnerables, como poderían ser os condutores de vehículos de dúas rodas e os peóns.

Durante a fase de intensificación da vixilancia no tramo da estrada PO-331, os efectivos da Agrupación de Tráfico da Garda Civil con base no Destacamento do Porriño, detectaron un total de 89 infraccións á normativa de Seguridade Viaria, ademais de imputar a suposta comisión dun delito a un condutor que circulaba tras perder a totalidade dos puntos do seu permiso de condución.

Estas actuacións de carácter intensivo sobre tramos concretos da rede viaria galega cunha alta sinistralidade seguirán implementándose dentro da estratexia que a Xefatura do Sector de Tráfico de Galicia expón para o ano 2017, co obxecto de incidir de forma determinante sobre a seguridade viaria en busca do obxectivo de diminuír todo o posible o número de persoas que perden a vida nas nosas estradas ou sofren graves lesións nelas.

Anuncios

Deja un comentario

Tu dirección de correo electrónico no será publicada.