O CPR de FP Ribera Povisa celebrou o acto de gradación de 80 alumnos dos seus tres ciclos formativos de Grao Superior: Anatomía patolóxica e citodiagnóstico, Radioterapia e dosimetría e Imaxe para o diagnóstico e medicina nuclear, no centro social Afundación.
O evento, que estivo presidido pola directora xerente do Hospital Ribera Povisa, Ángela Guerra, contou coa presenza do alcalde de Vigo, Abel Caballero; a Directora Xeral de Formación Profesional da Consellería de Educación, Ciencia, Universidades e FP, Mª Eugenia Pérez Fernández; o Director territorial da Consellería de Educación, Ciencia, Universidades e FP en Pontevedra, César A. Pérez Ares; e o director da Escola Universitaria de Enfermería Ribera Povisa, Manuel Torres Vizcaya.
O profesor do CPR Ribera Povisa, Vicente Suárez, encargouse da conferencia maxistral co tema: “Os cambios desde a Psicoloxía”.
Por primeira vez, o CPR Ribera Povisa entregou dous Premios á Excelencia Académica para recoñecer o esforzo e dedicación de quen finaliza os seus estudos de formación profesional de grao superior cun excelente rendemento académico. O primeiro premio foi para Paula Ríos Martínez, do Ciclo Formativo de Grao Superior de Anatomía Patolóxica e Citodiagnóstico, e o segundo premio foi para Miriam Martínez Pereira, do Ciclo Formativo de Grao Superior de Imaxe para o diagnóstico e medicina nuclear.
A Escola Universitaria de Enfermería Ribera Povisa e o CPR de Formación Profesional Ribera Povisa levan máis de 25 anos dedicados á formación de profesionais do ámbito sanitario. Os ciclos de formación profesional capacitaron a máis de 2.300 alumnos e alumnas co apoio do Hospital Ribera Povisa, centro que achega á gran maioría dos profesores e brinda a oportunidade aos estudantes de realizar alí as súas prácticas e iniciar a súa carreira laboral.
