O subdelegado do Goberno en Pontevedra, Abel Losada, destacou hoxe as boas cifras da provincia en materia de seguridade tras estudar os datos de infraccións penais da provincia correspondentes ao peche do ano 2023 expostos na Xunta Provincial de Seguridade, que se celebrou na sede da Subdelegación do Goberno. O número de infraccións rexistradas descendeu un 3,22% na demarcación da Garda Civil e nun 0,51% no da Policía Nacional. O subdelegado, que presidiu a súa primeira Xunta Provincial de Seguridade tras a súa toma de posesión subliñou que cómpre tomar os datos con “moita prudencia” tanto cando son “moderadamente positivos”, como sucede agora, como cando sexan negativos.
Losada felicitou polo seu traballo ao longo do ano aos máximos responsables das Forzas e Corpos de Seguridade do Estado en Pontevedra, como son o coronel xefe da Comandancia da Garda Civil en Pontevedra, Simón Venzal; o xefe do Corpo Nacional de Policía en Pontevedra, Juan José Díaz; o comisario xefe da Comisaría de Vigo-Redondela, Ramiro Gómez, e o responsable provincial da Garda Civil de Tráfico, o capitán Antonio Pérez Piteira.
O subdelegado recalcou tras analizar os datos na Xunta Provincial que a provincia de Pontevedra é segura e así volven demostralo as estatísticas anuais e a comparación coas medias en España. A este respecto destacou que a taxa de criminalidade é de 30,28 delitos por cada mil habitantes, moi por debaixo da media española, que está nun 36,9 por mil habitantes.
Ademais púxose de releve o papel preponderante da ciberdelincuencia, fundamentalmente estafas, se ben cun comportamento irregular na provincia, pois mentres que descendeu no territorio rural incrementouse no urbano ao longo do pasado ano. Aínda así a porcentaxe de ciberdelitos quedou o ano pasado nun 23%, moi por debaixo do 30% que chegou a alcanzar en 2019, cando case un de cada tres delitos estaba relacionado con enganos e estafas a través da Internet.
Trátase dun tipo de delitos especialmente difíciles de investigar e de esclarecer polas súas conexións internacionais e pola escasa cooperación internacional dos países nos que se asentan este tipo de redes. Ademais, detectouse que hai unha “migración” progresiva das mafias dedicadas ao tráfico de drogas a este tipo de actividade delituosa, dado que resulta altamente rendible. Abel Losada relacionou o combate contra a ciberdelincuencia coa nova Lei de Ciberseguridade anunciada onte mesmo polo ministro de Transformación Dixital e Función Pública, José Luis Escrivá, que será un novo avance para mellorar a resposta diante dos ataques ás empresas e ás persoas. O futuro teto legal tamén prevé que o INCIBE (Instituto Nacional de Ciberseguridad) continúe formando especialistas neste eido, entre eles aos responsables das Forzas e Corpos de Seguridade.
No balance anual da Garda Civil constátase, en xeral un pequeno incremento dos delitos leves mentres se reducen os graves como os roubos con forza, que baixan de xeito importante, entre eles os roubos en vivendas. Finalmente, comprobouse unha mellora no traballo policial da Garda Civil coa mellora das porcentaxes de esclarecemento das infraccións penais investigadas e o incremento no número de persoas detidas.
A Policía Nacional constatou unha mellora nos índices de esclarecemento, así como do número de persoas detidas e subliñou especialmente a redución nos delitos contra as persoas, especialmente os de lesións graves. Non obstante, amosou a súa preocupación polo progresivo incremento anual do impacto do lecer nocturno, despois da pandemia, sobre determinado tipo de delitos tanto contra a propiedade como as persoas.
