O persoal do Hospital Ribera Povisa doou 6100 quilos de produtos de primeira necesidade ao Banco de Alimentos de Vigo, grazas ao donativo achegado na cea do 50 aniversario do hospital, que se celebrou o pasado 21 de decembro. En representación dos traballadores do hospital, Lorena Vilán, Manuel Domínguez, Miguel Ferradás, Julio César Verde, Mara Parente e Remedios Campos entregaron o donativo equivalente a 6.100 quilos de alimentos a Iván Martínez, Presidente do Banco de Alimentos de Vigo nun acto organizado no centro.
Os profesionais do Ribera Povisa que asistiron á cea de celebración do 50 aniversario realizaron un donativo voluntario ao retirar as súas invitacións e elixiron cos seus votos a organización á que se destinarán finalmente os fondos recadados, nunha iniciativa, promovida desde o Departamento de Comunicación, Márketing e Responsabilidade Social Corporativa de Ribera Povisa. Con este xesto culmínase a celebración do 50 Aniversario do Hospital Ribera Povisa, que incluíu un acto institucional, celebrado o 19 de decembro, no que o Alcalde de Vigo, Abel Caballero, anunciou a concesión da medalla de ouro da cidade ao centro sanitario.
Ademais, os pacientes e visitantes do hospital poden percorrer na planta 0 do hospital unha exposición histórica na que se destacan os fitos máis importantes da traxectoria de Povisa nas últimas cinco décadas. Tamén poden asistir no Salón de Actos á proxección dun vídeo no que representantes institucionais e traballadores do centro repasan a historia de vocación de servizo á atención sanitaria dos pacientes do centro sanitario.
