A Garda Civil do Posto de Baiona-Nigrán, nunha actuación conxunta con axentes do Grupo Operativo de Policía Xudicial da Policía Nacional da Comisaría de Vigo-Redondela, deteñen a dous homes como autores de roubos con forza en establecementos comerciais na cidade de Vigo e área metropolitana do sur da provincia.
Esta investigación está relacionada coa detención doutras dúas persoas o pasado mes de outubro por mor de roubos con forza acaecidos en distintas localidades da provincia.
A Garda Civil de Baiona-Nigrán procede en Vigo á detención dun veciño da localidade, de 28 anos, con multitude de antecedentes por roubos, como presunto autor polo menos de seis roubos con forza en locais comerciais (2 en Cantabria, tres en Asturias e un en Baiona), ademais dun presunto delito de pertenza a grupo criminal.
Intervense no interior do vehículo usado polo detido, dúas mazas e outras ferramentas usadas para cometer os roubos, garrafas con sistema de succión para roubar gasolina, así como documentación relacionada con roubos en Redondela, Valença e Ponte De Lima en Portugal.
Esclarécense ata o momento 26 feitos delituosos ocorridos en Galicia, Asturias, Cantabria e Portugal, onde se confirma que os investigados forman parte dun grupo criminal, dedicado a roubos con forza en establecementos.
Así mesmo, con data 8 de novembro axentes da Comisaría da Policía Nacional de Vigo-Redondela procederon á detención do outro integrante do grupo criminal que se deu á fuga o pasado día 23 de outubro.
