A delegada territorial da Xunta de Galicia en Vigo, Ana Ortiz, visitou este sábado o Centro Juan María de Nigrán tras a concesión por parte do Goberno galego dunha axuda de 47.713 euros para a compra dun vehículo a través da Asociación Benéfica Social de Pais e Amigos La Esperanza del Val Miñor.
“Quero destacar ante todo o gran labor que se realiza desde a entidade, responsable de xestionar o Centro Juan María de Nigrán, para mellorar a atención dos seus usuarios”, destacou a representante autonómica durante o percorrido polas instalacións no que estivo acompañada polo alcalde de Nigrán, Juan González.
Ana Ortiz sinalou que “o traballo do centro é vital para ofrecer ás familias calidade de vida no coidado das persoas que a necesiten e a Xunta de Galicia sempre vai estar ao seu lado para axudar en todo o que necesiten”.
A Consellería de Política Social concedeu a axuda a través das subvencións destinadas á adquisición de vehículos que faciliten a prestación de servizos a persoas dependentes ou a persoas con discapacidade por entidades de iniciativa social ao abeiro do Plan de Recuperación, Transformación e Resiliencia financiado pola Unión Europea- NextGenerationEU.
