O Vigo-Rías Baixas empeza forte o último mes da tempada. Cunha aliñación capaz de adaptarse a calquera guión de carreira, a estrutura presidida por José Luis Chamorro inicia este luns a Volta a Cantabria’23 Internacional. Será a primeira das tres roldas por etapas que o conxunto flúor disputará en setembro.
A prestixiosa carreira cántabra, cuxos catro últimos gañadores compiten actualmente no campo profesional, ofrece tres xornadas de media montaña nas que calquera desenlace é posible. Se os escaladores puros impoñen a súa lei, Jesús Blanco Villar conta con Mardoqueo Vásquez, que vén de subir ao podio na explosiva Domaio Heroica – Desafío Delio Fernández. No caso de non chegar a romper o pelotón por completo, pero si a quedar moi reducido, Pablo Ara demostrou durante o mes de agosto a súa regularidade, asinando dous terceiros postos. Outro escenario pode ser algunha chegada ao sprint, sobre todo na segunda xornada, e nese tipo de finais Noel Martín é un seguro de vida.
Xunto aos tres corredores elite, o Vigo-Rías Baixas formará cos sub23 Cristino Lanchas, Pelayo Alonso e Pepe Pérez. A escuadra olívica chega ás últimas semanas do curso ocupando posto de podio no Clasificación Elite por equipos da Real Federación Española de Ciclismo (RFEC). Marcha terceira antes do bloque de tres voltas que compoñen Cantabria, Salamanca (do 8 ao 10) e Galicia (do 14 ao 17).
Tres etapas
A primeira xornada en terras montañesas consta de 153 quilómetros con saída e chegada en Vioño. O “muro” do Cemiterio de Salcedo e o seu vertixinoso descenso ata a liña de meta designarán ao primeiro líder. O martes entre Somo e Marina de Cuyedo (135 km) ascéndese o porto de Alisas, de 2ª categoría, e desde a súa cima restan pouco máis de 25 km para a conclusión. A Volta a Cantabria resolverase o mércores no 148 km que arrancan de Puente Viesgo e terminan en Cuevas del Monte Castillo, ascensión de 3ª categoría e cun quilómetro ao 9,3% de desnivel medio.
