Coa baixada do Altar Maior de Santa Cristina e a súa colocación na anda iniciouse este venres na Igrexa de Sabarís a novena, que se prolongará durante toda a semana. O domingo 23 de xullo ás 20:00 horas sairá en procesión ata a Praza Victoria Cadaval e posterior regreso, e o luns día 24, tras a Misa Solemne que se celebrará ás 12:00 do mediodía, sairá de novo en procesión ao redor do templo. Mentres, o seu trono está cuberto por Santa Teresa de Jesús. O repenique de campás pola baixada de Santa Cristina correu a cargo de Carlos Riveiro.
Grandes festas na honra de Santa Cristina
O programa de festas comezará o sábado 22 de xullo cunha verbena amenizada pola orquestra Costa Blanca e o trío D’Líder. O domingo día 23 a charanga Vai de Baile ofrecerá desde as 10:00 da mañá e durante todo o día pasarrúas e actuacións. Ás 20:00 horas sairá a procesión de Santa Cristina ata a Praza Victoria Cadaval e posterior regreso. Pola noite, a verbena estará amenizada pola orquestra Saudade e o trío Azar.
O luns 24 ás 11:00 da mañá actuará o grupo Os Terribles de Donas. Ás 12:00 do mediodía celebrarase a Misa Solemne cantada pola Coral Polifónica de Belesar con posterior procesión ao redor do templo acompañada por Os Terribles de Donas. Pola noite, a orquestra Alabama e o trío X’Tra amenizarán a verbena fin de festa.
