A candidata do PP á alcaldía de Nigrán, María José Pino, confirma que demandará ante Fiscalía o informe elaborado por Intervención onde, entre outras irregularidades, reflíctense máis de 19.000 facturas “legalmente improcedentes correspondentes a contratacións verbais” e cuxos reparos foron levantados polo actual goberno local desde mediados de 2018 ata finais do pasado ano.
Tanto Pino como o seu equipo lamentan profundamente que este capítulo manche a imaxe do municipio e confían en que as autoridades xudiciais investiguen o documento elaborado polo funcionario, entregado a mans do partido durante o pleno do pasado 28 de abril. Neste sentido a candidata cualifica a situación de “intolerable” e reitera unha vez máis que non quedará de brazos cruzados ante unha dinámica que “resume o día a día dos oito últimos anos de mandato co alcalde socialista Juan González á cabeza, que leva o amiguismo, os contratos a dedo e o descontrol dos fondos públicos por encima de todo”. Adianta que o caso xa está en mans dun avogado e que se presentarase ante o órgano competente nos próximos días.
Con todo, reitera que isto é só unha pequena parte do recollido no documento que entre outros puntos tamén denuncia subvencións encubertas, gastos que non corresponden á súa competencia, contratos fóra da normativa contractual pública, gastos carentes de fiscalización e de crédito, recoñecementos extraxudiciais como práctica habitual ou mesmo a inexistencia do control de entrada e saída tanto de material, como de ferramentas, de vehículos e maquinaria do almacén municipal (Vías e Obras). Desde o grupo inciden a extrema gravidade de todo o que se reflicte no informe, incluso obrigando ao propio Interventor a poñelo en coñecemento do Pleno do Concello en abril, que á súa vez advirte tamén por escrito que o levará “no seu momento ante o Tribunal de Contas e se fose procedente ante os tribunais de Xustiza”.
“Estivemos a estudar o documento punto por punto e nun primeiro momento iamos esperar a que pasasen as eleccións, pero tras a súa filtración aos medios non nos queda máis remedio que actuar xa”, declara. Neste sentido, a candidata do PP lembra que non é a primeira vez que desde o seu grupo advirten destas irregularidades. “Desde o Partido Popular denunciamos reiteradamente en numerosos plenos o que agora o Interventor recolle nun informe de máis de 80 páxinas”, explica, mentres lamenta que non lles fixeron caso con anterioridade. “19.187 facturas por valor de 17.039.618 euros supoñen millón e medio máis que o orzamento de todo un ano. Un auténtico despropósito”, afirma.
Ao longo da semana o Partido Popular continuará coas visitas ás distintas parroquias Panxón, Priegue, Parada, Vilariño e finalizando o vindeiro domingo na comida popular no Centro Cultural de Bolos de Camos, á que asistirá o presidente da Xunta de Galicia, Alfonso Rueda. “Temos proxecto, temos equipo e queremos transformar o concello e acabar cos escándalos administrativos asociados ao actual rexedor municipal”, remata Pino.
