Máis de 70 colectivos solicitan unha Declaración de Impacto Ambiental desfavorable para o parque eólico Toroña

Nos últimos meses publicáronse as Declaracións de Impacto Ambientais (DIAs) dos Parques Eólicos (PEs) Albariño I e Merendón, proxectados na Serra da Groba. En ambos os dous casos foron desfavorables. No caso do PE Albariño I os técnicos da Dirección Xeral de Patrimonio Natural poñen en evidencia as graves deficiencias do proxecto cuxo Estudo de Impacto Ambiental (EIA) non recollía a existencia de charcas estacionais, presentaba un deficiente inventario dos hábitats de interese comunitario, flora e fauna e establecía unhas medidas protectoras e correctoras imprecisas que impedían a súa execución. En definitiva, consideran a documentación do proxecto inadecuada.

No mesmo sentido pronunciouse o Instituto de Estudos do Territorio (IET), que avalía a afección do proxecto ás Áreas de Especial Interese Paisaxístico (AEIP) situadas na zona: a AEIP Serra da Groba, a AEIP Devesa da Costa, a AEIP dos Montes do Facho e Tetón, a AEIP de Corroubelo e a AEIP Chan da Valga, para as que calcula unha afección visual do 90%, 87%, 67%, 89% e 85% respectivamente, e resalta que mentres o Estudo de Impacto Ambiental realizado pola empresa adxudicataria cualifica o impacto sobre a paisaxe como “moderado”, o IET entende que “esa valoración e as medidas preventivas propostas, non resultan coherentes coas análises realizadas”. Conclúe o Instituto que “o proxecto producirá uns impactos críticos sobre a paisaxe, que alterarían de forma irreversible os valores das AEIP máis afectadas, sen que tales efectos poidan mitigarse con ningún tipo de medida correctora”.

No caso do PE Merendón, o Instituto de Estudos do Territorio resalta a importancia na área afectada polo PE das numerosas Áreas de Interese Paisaxístico, numerosos miradoiros, sendeiros, o Camiño de Santiago Portugués pola Costa e o corredor ecolóxico delimitado polo Plan de Ordenación do Litoral (POL) e conclúe que a valoración que fai o proxecto do impacto paisaxístico non está ben fundamentada e que os impactos na paisaxe, que non poderán mitigarse con ningún tipo de medida correctora, serán críticos e irreversibles.

Ao respecto destas dúas resolucións, o Instituto de Estudos Miñoráns quere expresar o seu agradecemento a todos os colectivos e cidadáns que advertindo o gran deterioro medioambiental que producirían estes PEs na Serra da Groba expresaron a súa contundente oposición na masiva manifestación do 16/05/2021 e a tamén masiva presentación de miles de alegacións aos proxectos. Foi esta mobilización cidadá a que conseguiu lanzar un chamamento ás administracións públicas que finalmente concluíron os irreversibles e críticos efectos destes proxectos na Serra da Groba. “Agradecemos polo tanto tamén aos técnicos e técnicas da Dirección Xeral de Patrimonio Natural e do Instituto de Estudos do Territorio a súa implicación na avaliación real dos efectos destes proxectos”.

Porén, lamentan que algunhas administracións da Xunta de Galicia non actúen coa mesma dilixencia e obxectividade na defensa do patrimonio público. “É o caso, por exemplo, das afeccións aos numerosos xacementos arqueolóxicos, patrimonio cultural que testemuña o pasado dos habitantes da Serra da Groba, ou a ausencia de estudos hidrolóxicos e hidroxeolóxicos que analicen e valoren os efectos sobre os recursos hídricos e as súas consecuencias para as numerosas poboacións que dependen deste recurso xerado na Serra da Groba, as afeccións referidas a turismo e ocio, así como a carencia de estudios sobre a afección aos garranos na serra, etc”.

Na actualidade está a exposición pública o proxecto do PE Toroña, cuxo prazo para presentar alegacións remata o vindeiro luns, 23 de xaneiro. De novo, este PE atenta contra os valores patrimoniais, tal e como denunciou o IEM diante da Dirección Xeral de Patrimonio, do Instituto de Estudos do Territorio (IET) e do Concello de Baiona, debido á mala calidade do estudo de efectos sobre o patrimonio contido no proxecto. Así mesmo o Estudo de Impacto Ambiental non avalía convenientemente os efectos do proxecto sobre a fauna, a flora, os ecosistemas ou a paisaxe, circunstancia da que xa advertiu o IET para o PE Albariño I que ocupa parcialmente a mesma área de afección paisaxística.

Son evidentes os valores que atesoura a Serra da Groba, un espazo natural enclavado nunha das zonas con maior densidade poboacional de Galicia que sufre unha gran presión antrópica e que cómpre preservar e protexer para garantir a sustentabilidade do territorio. Xa en 2011 o LIC Serra da Groba foi proposto para a ampliación da Rede Natura 2000 ao abeiro do Anuncio do 21 de decembro de 2011 da Dirección Xeral de Conservación da Natureza, pola que se sometía á participación do público a proposta de ampliación da Rede Natura 2000 de Galicia. Daquela a proposta foi desbotada por non ser considerada prioritaria.

Hoxe, ante as graves ameazas que poderían condenar á Serra da Groba ó seu deterioro irreversible, máis de 70 colectivos solicitan que se emita unha DIA DESFAVORABLE ao PE Toroña; á Consellería de Economía, Emprego e Industria da Xunta de Galicia que retire as Áreas de Desenvolvemento Eólico (ADEs) 157, 158 e 41, do Rexistro Eólico de Galicia que afectan á Serra da Groba; ás administracións públicas, locais, comarcais, provinciais e autonómicas que realicen os trámites necesarios para incluír a Serra da Groba dentro da rede de espazos protexidos.

“Non podemos permitir que se perdan os nosos valores culturais e patrimoniais, naturais, paisaxísticos, etnográficos. Debemos preservar os servizos ecosistémicos como unha garantía para as seguintes xeracións”, conclúen desde o IEM.

Colectivos que suscriben esta nota de prensa

  • A Jalleira
  • A Ría Non de Vende
  • A.C. Berra Val Miñor
  • AA.VV. e Cultural Casco Vello
  • AC A Velha na Horta
  • AC Xuliva
  • ADEGA
  • ADEGA (Delegación de Vigo)
  • AGA (Asociación Galega Apicultura)
  • Agrupaçom de montanha Augas Limpas
  • Amigos da Terra
  • APEOM
  • Asoc. Permacultura «Eiras de Miño»
  • Asoc.»ViaxaMos no tempo»
  • Asoc. Trece Catorce
  • Asoc. Veciños de Chenlo
  • Asoc. Veciños de Valladares
  • Asoc. Veciños de Vincios
  • Asociación A Groba
  • Asociación Aire Limpo (As mariñas-Mandeo)
  • Asociación A-Legre
  • Asociación Cultural Berra Val Miñor
  • Asociación Cultural Pedraghullo
  • Asociación de Comuneiros de Chá (Ferrol)
  • Asociación Mundo Minero
  • Asociación Naturalista do Baixo Miño (ANABAM)
  • Asociación Treze Catorze
  • Bembribe: Pena Cabalaria
  • Bouzas Móvete
  • C. S. A Revolta
  • C.C. As Pedriñas
  • C.M.V.M.C. de Chaín
  • C.M.V.M.C. de Couso
  • C.M.V.M.C. de Valadares
  • C.M.V.M.C. de Vincios
  • C.M.V.M.C. de Zamáns
  • C.S. A Comuna (A Coruña)
  • C.S. A Faisca
  • C.S. A Revolta
  • C.S. Lume
  • C.V. contra a Macrodepuradora do Lagares
  • Caleidoskopio
  • Club Escalada Montaña Azimut
  • Club Montañeiros Celtas
  • Club Peña Trevinca M.G.
  • Clube de Montaña Xistra
  • Clube Espeleolóxico Mauxo
  • CMMC de Oia
  • Colectivo Xogo Descuberto
  • Co-mando Ghichas
  • Comité de defensa das Rías Altas
  • CS A Faisca
  • CS Fuscalho
  • Escalada Sostenible Galicia
  • Federación AA.VV. Eduardo Chao – Vigo
  • Federación Galega Montañismo
  • Foro Social de Cangas
  • G.A.S. Vigo
  • Grupo de Montaña Alud
  • Instituto de Estudos Miñoráns (IEM)
  • Nova Escola Galega
  • OAR Redondela
  • Outro vigo é posible
  • Plataforma Cidadá de Redondela
  • Plataforma Defende Mos
  • Plataforma Defensa da Ría Cíes
  • Plataforma pola protección da Serra do Galiñeiro
  • Plataforma veciñal Quijote (Outes)
  • Salvemos Monteferro
  • Salvemos O Salgueirón
  • SOS Serra da Groba
  • Verdegaia
  • Voces polo Litoral de Teis