A Federación Galega de Bolos, con Isidro Costas e José Rodríguez á cabeza, celebrou este xoves no Centro Cultural de Mañufe a súa VI Gala do Deporte, na que se entregaron as distincións e trofeos aos clubs e xogadores destacados na tempada 2022, así como os trofeos do Torneo de Nadal do ano 2021, ademais do Trofeo Ibérico a medios de comunicación e institucións.
O bolo celta, ademais de na zona sur da provincia de Pontevedra, tamén se practica con algunha variante na provincia de Lugo, localidades como Xove, Ribadeo, Trabada, Barreiros, Pontenova, Meira, Quiroga e na propia cidade de Lugo, en Coruña concéntrase principalmente na zona do Barbanza, concellos de Boiro, Ribeira e Padrón, e na de Ourense sobre todo no concello de Viana do Bolo. A modalidade nacional ademais de en Galicia practícase en Asturias e Madrid, competidores da comunidade galega.
Desde a Federación están a incluír á muller na práctica dos bolos celta a través das políticas gobernamentais impulsadas polo Consello Superior de Deportes como xestor público do deporte en España e co apoio da Federación Española de Bolos para mellorar o seu reflexo no mundo do deporte e neste caso no mundo dos bolos.
Este ano celebrouse na localidade de Burgos o III Encontro Intermodal Feminino Nacional, no que ademais de practicar varias modalidades de bolos das distintas autonomías participantes (Andalucía, Asturias, Castela e León, Cantabria e Galicia), celebráronse unhas xornadas de convivencia entre todas as participantes nas que cada comunidade presentou a súa modalidade de bolos. No meramente deportivo ao contrario do que sucedeu o ano pasado a selección galega ocupou o último lugar.
É unha realidade a impartición de clases de bolo celta nos distintos colexios e tamén dentro das escolas deportivas dos tres concellos do Val Miñor, grazas a un convenio de colaboración entre a Federación e a Mancomunidade.
Tras a proxección dalgunhas fotos dos distintos campionatos nacionais, rexionais e locais celebrados durante este ano, comezou a entrega de galardóns, da man dos alcaldes de Baiona e Gondomar, Carlos Gómez e Paco Ferreira, os concelleiros de Deportes de Baiona, Gondomar e Nigrán, Andrea Pérez, Nuria Lameiro e Jose Luis Sanromán, e a concelleira de Educación de Nigrán, Marina Vidal.
Entregáronse un total de 161 diplomas e 92 trofeos. Todos os galardoados, xogadores e clubs, das categorías chupete, prebenxamín, benxamín, alevín, infantil, cadete, xuvenil, sénior, veteranos, superveteranos e feminina, pertencen á comunidade galega, en maior parte á provincia de Pontevedra e máis concretamente á zona sur.
Primeiro entregáronse os diplomas do ano 2022, os trofeos e diplomas do Torneo de Nadal do 2021, e para finalizar, os diplomas e trofeos dos torneos da tempada 2022. Ademais, entregouse o VI Trofeo Ibérico a medios de comunicación e institucións que foi instituído no ano 2016, e que foi concedido nesta edición ao Concello de Gondomar. Ao finalizar a gala os asistentes puideron gozar duns petiscos.
