Os Concellos de Baiona e Pornic celebran o 25º aniversario da unión entre ambas as dúas localidades durante esta fin de semana. A xornada máis especial para esta celebración tivo lugar esta mesma mañá. O acto oficial de conmemoración do irmandamento celebrouse no Salón Monterreal do Parador Conde de Gondomar, despois da benvida a cargo do Alcalde de Baiona, Carlos Gómez Prado, e o Alcalde de Pornic, Jean Michel Brard. Así mesmo, ratificouse o irmandamento coa firma da acta de renovación. A continuación, procedeuse a un intercambio de bandeiras e de agasallos institucionais entre os concellos. O rexedor baionés fixo entrega ao seu homólogo francés dunha silueta da Carabela Pinta de aceiro obra da artista baionesa Irene Silva Xiráldez. O rexedor deu a benvida resaltando “a importancia destes proxectos internacionais, xa que aparte de servir para que se coñeza Baiona no exterior, neste caso en Pornic, serven para afianzar os lazos entre ambos os dous lugares irmáns, moi unidos desde o irmandamento no ano 1997”.
“Nestes 25 anos de irmandamento entre Baiona e Pornic, puidemos gozar de distintas actividades conxuntas entre ambas as dúas localidades, destacando que se importante é asinar unha acta de irmandamento, moito máis importante é ratificala e sobre todo darlle contido. Nestes últimos 25 anos os gobernos de Pornic e Baiona lográmolo promovendo intercambios en materia cultural, deportiva, de educación… E o máis importante, as veciñas e os veciños de Baiona puideron estreitar lazos de amizade con veciños de Pornic e viceversa. Entendemos que o éxito dos irmandamentos fanos as persoas e por iso, ambos os dous pobos, fixemos especial fincapé en implicar á cidadanía no proxecto”, destacou o alcalde no seu discurso, para engadir que “o irmandamento tamén nos permitiu que ambos os dous pobos traballemos pola construción común de Europa. Nestes momentos, nos que no vello continente só se fala de economía, nós, Pornic e Baiona, falamos de persoas e das cousas que nos unen”.
Entre a delegación francesa que se desprazou estes días á Vila para celebrar os actos do 25 aniversario do irmandamento figuran membros da corporación municipal da Ville de Pornic, representantes da asociación do irmandamento “Jumelage” e representantes do Club Pornic Basket Saint Michel, e os rapaces e rapazas franceses que o pasado mes de outubro participaron no intercambio deportivo co Club de Baloncesto Baiona. Tamén as artistas francesas Anne Malgogne Dumesnil “Amodu”, Brigitte Darras Dit “Bivan”, Fabbienne Alliou-Lucas. Entre as persoas asistentes ao acto tamén acudiron membros da actual corporación do Concello de Baiona e membros que formaban parte da corporación do ano 1997, cando se rubricou o irmandamento, así como representantes de distintas asociacións baionesas, representantes do IES Primeiro de Marzo co que se levou a cabo o intercambio educativo, representantes do Club de Baloncesto Baiona e a delegación baionesa de rapaces e rapazas que o pasado mes de outubro participou no intercambio deportivo co Club Pornic Basket Saint Michel.
25 anos da man para coñecer un intercambio entre localidades
O irmandamento de Baiona e Pornic formalizouse en Baiona o 14 de febreiro de 1997 e del xurdiron diferentes encontros cos que se logrou estreitar os vínculos de amizade e colaboración entre as dúas localidades. Así mesmo, e con motivo da conmemoración do 25 aniversario potenciouse esta relación cunha programación de intercambios en materia cultural, educativa, deportiva. No marco destas actividades, houbo encontros e viaxes como o realizado o pasado mes de outubro a Pornic polo alumnado de entre 16 e 17 anos, estudantes de francés de 4º da ESO e de 1º de Bacharelato do IES Primeiro de Marzo, que realizaron un intercambio educativo cun grupo de estudantes do Lycée du Pays de Retz de Pornic. O intercambio deportivo que se celebra esta fin de semana en Baiona e que mañá pola mañá terá como acto central o partido de baloncesto que se celebrará no Pavillón Municipal de Deportes de Baiona entre ou Club de Baloncesto Baiona e o Club Pornic Basket Saint Michel.
O intercambio cultural xa se iniciou no mes de xuño coa delegación baionesa de artistas que viaxou ata Pornic con motivo da “Exposition d’artistes de Baiona”, enmarcada na celebración do XXV aniversario do irmandamento entre as dúas vilas promovida pola asociación de Jumelage de Pornic na Maison du Chapître do 12 ao 20 xuño de 2022, en colaboración cos dous municipios. A exposición de artistas de Baiona tivo como comisaria á artista de Baiona Irene Silva, que participou cos seus gravados na mostra colectiva de pintura, gravado, escultura e foto-reportaxe, na que participaron tamén Caino Vasconcellos, Víctor Lorenzo, Carlos Padín e Nieves Loperena. Un intercambio cultural que tivo o seu retorno coa inauguración onte pola tarde non Multiusos Mercado de Sabarís da exposición e o encontro coas artistas “Afinidades Divesas”. As artistas francesas protagonistas deste bonito traballo son Anne Malgogne Dumesnil “Amodu”, Brigitte Darras Dit “Bivan”, Fabbienne Alliou-Lucas, xunto coas artistas baionesas Irene Silva, Mar Caldas e Elvira Jardón.
Todas estas persoas e asociacións implicadas no tecido da conmemoración deste simbólico “25 Irmandamento” recibiron como agasallo institucional do Concello de Baiona para lembrar esta data tan significativa unha figura da Carabela Pinta de aceiro obra da artista baionesa, Irene Silva.
