Baiona celebrou este sábado a 9ª edición do Trail de Montaña Trans Serra da Groba, organizado pola Concellería de Deportes e composto por dúas probas de diferente nivel e percorrido.
A primeira proba, un Trail de Montaña de 29 Km, tivo o seu pistoletazo de saída no Pavillón Municipal de Deportes de Baiona ás 8:30 horas, con 90 inscritos. Ás 9:30 horas saían os 249 atletas do Trailiño, que completaron un percorrido de 17 km. En total, máis de 300 participantes entre as dúas.
Alberto Outeda Míguez, de Pontevedra, e María Martínez González, do Porriño, impuxéronse no Trailiño, cun tempo de 01:29:08 e 1:44:04 respectivamente. Saúl Nemesio Vázquez Pedreira (1:38:47) e Jurdana Márquez Salazar (2:10:09) foron os primeiros atletas baioneses en cruzar a meta. Por equipos, o primeiro clasificado foi o Trail Running Nigrán.
Na proba raíña, o Trail de 29 km, a vitoria foi para Dani Martínez Puerta de Oia, cun tempo de 02:41:04. Na categoría feminina, Raquel Doiro González, de Vigo, quedou primeira cun tempo de 03:50:52. Daniel Pazó Giráldez e Loreto Rodríguez Martínez foron os vencedores locais, cunhas marcas de 02:41:56 e 03:50:52 respectivamente, e o Atletismo Baiona+UltraLifeTeam, primeiro clasificado por equipos.
