A ciencia e a tecnoloxía poden ser poderosos aliados para mellorar a vida das persoas que sofren enfermidades neurodexenerativas. Conscientes desta alianza, o Concello de Baiona, a través da Concellería de Servizos Sociais, pon en marcha unha experiencia piloto cunha aplicación que funciona como un asistente de conversación.
O proxecto “En Compañía” – “Acompañamento Terapéutico a Persoas con demencia”, no que algunhas persoas de Baiona participan, está financiado por Fundación laCaixa e desenvolvido polo Grupo de Tecnoloxías da Información GIT do Centro Atlantic da UVigo e AFAGA Alzhéimer, unha iniciativa á que non dubidou en sumarse o Concello de Baiona.
Foi deseñada para persoas usuarias que viven soas en zonas rurais. Os usuarios e usuarias baioneses seleccionados para este pioneiro proxecto reciben a aplicación nos seus respectivos domicilios. A medida que os usuarios empecen a traballar co asistente, o contido que recibirán irá personalizándose para que a intervención sexa cada vez máis individualizada e axústese ás diferentes necesidades das persoas.
O Alcalde de Baiona, Carlos Gómez Prado, e a Concelleira de Servizos Sociais, Conchy Vara, reuníronse esta mañá, Día Mundial do Alzhéimer, cunha representante da Asociación de Familiares de Enfermos de Alzhéimer e outras Demencias de Galicia (Afaga) para coñecer de primeira man este proxecto pioneiro.
O rexedor reflexionou “que a sociedade se dirixe a que haxa menos persoas convivindo nas casas e que por iso desde a administración máis próxima á veciñanza, a administración local, temos que apoiar este tipo de iniciativas e crear ferramentas para responder ás demandas das persoas vulnerables que o necesitan”.
Gómez Prado concluíu que “en definitiva, con esta colaboración trátase de impulsar actividades conxuntas que melloren a calidade de vida das persoas con enfermidades neurodexenerativas”.
