Medio milleiro de persoas acudiron este sábado ás poxas de San Antonio no barrio de Vilariño, na parroquia nigranesa de San Pedro da Ramallosa. Na tradicional poxa, a cargo de Carlos Riveiro, pagáronse entre 20 e 70 euros por plantas, froita, patos, coellos, polos, canarios, galos, roscas, doces ou pasteis. O máis cotizado foi un cordeiro, que se vendeu por 150 euros, e un porco, que acadou os 200 euros.
A programación prevista finalizará este domingo día 19 de xuño. Ás 10:00 da mañá haberá un pasarrúas a cargo da Agrupación Musical de Belesar. Ás 12:00 do mediodía celebrarase a Misa Solemne con posterior procesión na honra de San Antonio acompañada pola mesma Banda de Música. Ás 21:00 horas comezará a verbena co grupo D’Líder.
