Baiona asina o seu primeiro convenio coa asociación Afaga Alzhéimer

O Concello de Baiona e a asociación Afaga Alzhéimer, asinaron por primeira vez un convenio para desenvolver accións conxuntas en beneficio das persoas con demencia e dos seus familiares. Este acordo foi asinado por Carlos Gómez Prado, Alcalde de Baiona, e Juan Carlos Rodríguez, presidente de Afaga Alzhéimer, tras unha reunión na que tamén estaba presente Conchy Vara, concelleira de Servizos Sociais.

Trátase da primeira vez que se rubrica este tipo de convenio entre o consistorio baionés e a asociación. A colaboración entre ambas as dúas entidades ten por obxecto impulsar actividades conxuntas que melloren a calidade de vida das persoas con demencia e/ou os seus familiares. Entre estas accións destaca a posta en marcha de campañas de formación á poboación da localidade dirixidas ao diagnóstico precoz do alzhéimer e outras demencias, a organización de obradoiros e conferencias divulgativas, a organización de actividades formativas e de acompañamento para coidadores familiares e a cesión de espazos para o desenvolvemento de proxectos piloto de atención ás persoas con demencia.

O primeiro edil mostrou a súa satisfacción polo feito de que “por primeira vez este Concello asina un convenio con esta entidade que tan bo labor fai de divulgación e concienciación, así como de apoio e acompañamento ás persoas que padecen esta enfermidade e aos seus familiares. O obxectivo é estreitar os lazos que nos unen para traballar xuntos e facer canto estea na nosa man para axudarvos no voso labor e colaborar naqueles actos que organicedes”.

O rexedor valora de forma moi positiva este acordo. “Coa firma deste convenio damos un paso máis na atención ás persoas que teñen unha demencia e ás súas familias, son accións que xa se están realizando grazas á estreita colaboración que o Concello de Baiona mantén con Afaga, pero desta forma poñemos sobre o papel o compromiso que ambas as dúas entidades temos e tamén asumimos o reto de ampliar e impulsar os proxectos para abarcar así un núcleo de poboación cada vez maior -posto que o número de persoas con demencia tamén aumenta cada ano- e para ofrecer unha mellor atención”.

Gómez Prado concluíu que “en definitiva, con esta colaboración trátase de impulsar actividades conxuntas que melloren a calidade de vida das persoas con demencia e a dos seus familiares”.

Afaga Alzhérmer vén desenvolvendo en Baiona os obradoiros do Programa de Estimulación Terapéutica e o Obradoiro “Cultiva a mente”. Unha serie de obradoiros que teñen como obxectivos específicos manter as capacidades mentais e funcionais o maior tempo posible, evitar a desconexión e fortalecer as relacións sociais, facilitar o descanso aos coidadores e as súas familias e mellorar o seu estado emocional. Estas actividades desenvolvésense no Multiusos Ángel Bedriñana do Concello de Baiona na rúa Carabela Pinta.

Xa son moitos os veciños e veciñas do municipio que se beneficiaron destas actividades, unha experiencia que cualifican moi enriquecedora para todos eles. Coa firma deste convenio reforzaranse as accións. O Alcalde e a concelleira “queren agradecer a Afaga o seu traballo pola saúde dos e as maiores” e lembra que no Concello “sempre camiñaremos da man das asociacións que traballan para mellorar o benestar dos veciños”.