30 voluntarios en Nigrán participarán este venres e sábado no #mayosolidario

A Fundación Provincial Banco de Alimentos de Vigo mobilizará 15 voluntarios este venres e sábado, 27 e 28 de maio, para participar no #mayosolidario organizado, por décimo ano consecutivo, por parte do supermercado Gadis.

Aínda que a campaña leva activa durante todo este mes de maio, a ONG decidiu reforzar con presenza de voluntarios esta última fin de semana coa intención de incentivar tanto as doazóns físicas de alimentos non perecedoiros como as achegas económicas ao pasar por caixa. A Operación Quilo, por tanto, está a desenvolverse dunha maneira mixta, a elixir por parte dos clientes de Gadis.

Os voluntarios que axudarán en Nigrán cubrirán o supermercado Gadis da rúa Manuel Lemos, no número 30, na Ramallosa. Todos eles, que estarán perfectamente identificados con petos do Banco de Alimentos, estarán de maneira ininterrompida, por quendas, durante todo o horario comercial do supermercado.

Ao mesmo tempo que en Nigrán, estarán a levar o #mayosolidario tamén noutras localidades da provincia. En concreto, serán uns 400 voluntarios os que participarán nesta Operación Quilo en Vigo (200 voluntarios), Mos (15), Tui (25), Pontevedra (50), Cambados (12), Lalín (25), Marín (15), Sanxenxo (12) e Vilagarcía (30).

2021, en cifras

A Fundación Provincial Banco de Alimentos de Vigo repartiu máis de 2 millóns de quilos de alimentos durante 2021. Con carácter apolítico e aconfesional, na actualidade atenden a unhas 22.000 persoas en situación de vulnerabilidade na provincia, ás que chegan a través das máis de 150 ONG e entidades homologadas coas que traballan. Todos os seus esforzos van encamiñados a velar polo cumprimento dun dos dereitos humanos máis fundamentais: o acceso a unha alimentación suficiente, segura e saudable.