A néboa puxo en xaque este sábado á frota de máis de 40 barcos que estes días dispútase nas Rías Baixas o Trofeo Repsol – 44ª Regata de Primavera organizado polo Monte Real Club de Yates.
Tras unha xornada inaugural na que foi o vento o que puxo a proba ás tripulacións, nesta segunda etapa os veleiros tiveron que verllas coa néboa, que obrigou ao comité de regata a atrasar a hora de comezo e a reposicionar a saída ata en dúas ocasións.
A pesar das dificultades rexistradas nos primeiros momentos, unha vez iniciada a proba os veleiros navegaron sen demasiados problemas durante o percorrido de algo máis de 17 millas desde o norte de Cíes ata a illa de Tambo, no interior da ría de Pontevedra.
Os 5 ou 6 nós de media que se rexistraron nos primeiros momentos foron aumentando de intensidade conforme pasaron as horas e xa nos últimos tramos, coa néboa xa disipada, chegaron a medirse ata 18 e 19 nós, o que axilizou o final da competición.
Na clase ORC 1-2-3, os barcos de Vigo e Canido fóronse directos aos postos máis altos da clasificación. O Magical de Julio Rodríguez (RCN Vigo) foi o máis rápido en completar a proba, en 2 horas e 14 minutos, e ostenta o ouro provisional. En segunda posición colocouse o Sailway de Rodrigo Ojea (CM Canido); e o Aceites Abril, patroneado por Jorge Pérez Canal (RCN Vigo), vai terceiro.
En ORC 4, o Sagar V de Rolando Andrade (Ro Yacht Club) anotouse a mellor puntuación da xornada, subindo directamente ao primeiro posto. A listaxe dos tres mellores do día complétano o Deep Blue 2.1 de Vicente Cid (RCN Vigo) e o Maracaná de Carlos García (RCM Aguete).
A competición dos ORC 5, resolveuse con vitoria do Secolite de Javier Rey (MRCYB). O Bouvento de Óscar José Comesaña (MRCYB) afrontará a última xornada desde a segunda posición e o Marcolfo de Antonio Francisco Gómez (RNC) chegará terceiro á final.
A tripulación formada polo portugués Rui Ramada e o galego Óscar González Peixoto foi a mellor da clase ORC A2, que se puxo en liza con equipos formados unicamente por dúas persoas. O Vagalume de Luis Vidal e Eva Fernández vai segundo.
Na clase J80, o Alboroto de Javier Aguado afrontaba esta segunda xornada desde a posición de líder e non defraudou. Volveu navegar moi ben e logrou unha nova vitoria que lle permite manter o dominio e achégalle aínda máis aos loureiros. Con 2 puntos na clasificación provisional, afástase dos 5 que ten o Okofen de Javier de la Gándara, segundo na táboa; e dos 9 do Cansino de Alejandra Suárez, que ocupa o terceiro caixón.
Na categoría Fígaro, que aínda que compite dentro de ORC recibirá premios como clase propia, o Bouvento de Óscar José Comesaña foi o mellor. O Silleiro de Ángela Rodríguez e o Erizana de Marta Quintáns, todos do Monte Real, van segundo e terceiro.
Os títulos decidiranse este domingo a unha única carta
Tras a celebración dos bastóns do venres para os J80 e a regata ata Combarro deste sábado, ao Trofeo Repsol queda unicamente unha xornada para descubrir aos seus gañadores. Os títulos decidiranse este domingo a unha única carta, unha única proba dunhas 23 millas entre Combarro e Baiona para as máis de 40 tripulacións aspirantes aos diferentes trofeos.
Unha vez finalizada a regata, o Monte Real Club de Yates acollerá, a partir das seis e media da tarde, a entrega de premios aos vencedores. Nela participarán o Subdirector e a Xefa de Mariña e Pesca de Repsol, Carlos Sánchez Nieto e Inés González Megido; e o presidente do Monte Real Club de Yates, José Luis Álvarez. Estarán acompañados por representantes das administracións local, provincial e autonómica.
Os gañadores da última edición do Trofeo Repsol foron o Yess Racing de Rui Ramada (ORC 1-2), o Bosch Service Solutions de Ramón Ojea (ORC 3), o Nahela de Víctor Álvarez (ORC 4), o Q Talento de Javier Rey e Jorge Justo (A2), o Okofen de Javier de la Gándara (J80) e o Tutatis de Miguel Montes (Fígaro).
