Lucenza-Ateneo de Nigrán organiza este venres 29 de abril, ás 20:00 horas, no Centro da Terceira Idade da Ramallosa (antiga estación do tranvía), unha conferencia-coloquio co historiador Anselmo López Carreira. O conferenciante será presentado pola compañeira do Ateneo de Nigrán Marisé Míguez.
O profesor López Carreira é un prestixioso historiador e investigador, especializado no período medieval de Galicia, autor de numerosísimos libros, artigos e relatorios nesta materia. López Carreira e Andrade Cernadas son autores do libro “O Reino medieval de Galicia. Crónica dunha desmemoria”, que vai ser presentado neste acto.
Destácase nesta obra que o vello Reino medieval de Galicia tivo unha entidade histórica real entre o século V e os comezos do século XIII, unha prolongada historia que sen embargo foi deturpada e agochada pola maior parte da historiografía española dos séculos XIX e XX. Dos porqués dese agocho e desa desmemoria dan conta os autores do libro que este venres se presenta.
