Regresa un ano máis a Gondomar o Campus Multideporte Solidario de Semana Santa, organizado pola Concellería de Deportes e dirixido aos máis pequenos da casa con idades comprendidas entre os 6 e 12 anos, que se desenvolverá nas instalacións deportivas do municipio os días 11, 12 e 13 de abril en horario de 10:00 a 14:00 horas.
O prazo de inscrición xa está aberto e prolongarase ata o 7 de abril no Pavillón de Deportes Bernabé Costas de Miranda, en horario de 17:00 a 19:00 horas. A veciñanza interesada en anotarse deberá achegar como mínimo 2 quilos de alimentos non perecedoiros para o banco de alimentos municipal.
Diversión, hábitos saudables e solidariedade unidos nunha actividade que tamén busca atender a demanda das familias para conciliar nestas datas de Semana Santa.
