O bloque de escaladores do Vigo-Rías Baixas chega ao seu terreo na terceira xornada da Copa de España Elite e Sub23. Este domingo dispútase a Aiztondo Klasikoa e na súa XVIII edición a clásica guipuscoana presenta un percorrido máis montañoso que o dos últimos anos. Aos corredores espéralles un trazado con sete portos que pon os dentes longos aos representantes da estrutura presidida por José Luis Chamorro.
Pablo Ara, Asier González, Martín Rey, Yurgen Ramírez, Joao Leite, Marcos García e Marcos Navarrete forman o “sete” que aliñará o conxunto flúor. Tras arrancar hai dúas semanas en Estremadura e continuar o pasado domingo na Rexión de Murcia, o certame composto esta tempada por once probas trasládase ao norte e realizará a primeira das súas tres visitas a Euskadi.
Os 140 quilómetros da Aitzondo Klasikoa poden dividirse en tres sectores ben diferenciados. Os primeiros 58 km atravesarán as localidades de Larraul -que acollerá a saída da proba-, Tolosa, Ordizia, Alegia, Altzo e Alteasu antes de afrontar a primeira subida ao alto de 2ª categoría de Alkiza , un porto de 4,5 km e un desnivel medio do 5,6%.
Unha vez completado o descenso a carreira entrará nun circuíto rompepernas de 14,3 km ao que se darán cinco voltas e que inclúe o repeito de Aduna, de 3ª categoría. Cando conclúan os cinco xiros unicamente restará unha segunda ascensión a Akiza, en cuxa cima estará situada a liña de meta.
O pelotón de 182 ciclistas poñerase en marcha ás 10:00 horas e está previsto que ao redor das 13:30 horas coñézase o nome do gañador. Cabe destacar que, en principio, poderán verse os últimos 80 km da Aiztondo Klasikoa a través da canle de YouTube de Sportpublic TV.
