O galego Iván Ferreiro é a nova confirmación do festival Vive Nigrán 2022 e actuará o venres 15 de xullo. Neste concerto poderemos gozar dos grandes éxitos da carreira do artista, cunha selección das cancións máis representativas dos seus 7 discos en solitario e os himnos da súa época en Piratas. As entradas xa están á venda en Ataquilla.com a un prezo de 25€ + gastos de xestión. Rigoberta Bandini foi a primeira artista confirmada para a sexta edición do festival, que volverá ao campo de fútbol de Monte Lourido os días 15 e 16 de xullo. As entradas diarias, xunto aos abonos, atópanse á venda en Ataquilla.com.
Superado con éxito o reto da anterior edición de 2021, a organización, fiel ao seu espírito, regresa este 2022 coa sexta edición do festival, que novamente se situará a escasos metros de Praia América, o seu incomparable escenario de cada verán no campo de fútbol de Monte Lourido. O festival contará unha vez máis co patrocinio de Vibra Mahou, a plataforma musical de Mahou Cinco Estrellas que busca reivindicar os encontros como algo esencial para vivir mellor, ademais do apoio do Concello de Nigrán.
Despois do éxito en 2021 con “Cuentos y Canciones”, un espectáculo audiovisual onde contaba a súa biografía á súa maneira, en 2022 Iván Ferreiro volverá subir ao escenario acompañado pola súa banda habitual. “Teño ganas de cantar máis e de falar menos”, di Ferreiro sobre “Canciones 2022”, un show especial e infalible onde soarán, ademais das cancións máis representativas dos seus 7 discos en solitario, algúns himnos da súa época en Piratas.
Iván irá acompañado pola súa banda habitual: Ricky Falkner (Love of lesbian, Egon Soda), Xabi Molero, Pablo Novoa (Golpes Bajos, La Banda de Late Motiv), Emilio Saiz, Marta Toro e Amaro Ferreiro. “Teño ganas de tocar cos meus amigos e gozar destas cancións, antes de saír con novo disco en 2023. Quero pasalo ben e celebrar”.
