Gondomar acolle a estrea do novo espectáculo de Teo Cardalda

O novo espectáculo do músico vigués, Teo Cardalda, “Claves Líricas”, estrearase este próximo venres 22 de outubro en Gondomar. A partir das 20:30 horas no Auditorio Municipal Lois Tobío poderemos gozar deste novo proxecto do artista no que mestura teatro e música, nunha especie de ópera-pop que xira ao redor da obra e figura do escritor e dramaturgo Ramón de Valle-Inclán.

Chega aos escenarios tras un importante traballo de documentación por parte de Teo Cardalda desenvolvido desde hai unha década da obra poética do autor de Vilanova de Arousa, que tamén se editou en forma impresa de disco-libro.

Tanto o espectáculo como o volume cos novos temas herdan o nome do recompilatorio de poemas que Valle-Inclán escribiu en 1930, entre os que María Monsolís, realizou unha selección de pezas que chegan envoltas de música, proxeccións e coreografías que nos permitirán viaxar a través do rock, o rap ou a balada, e mesmo descubrir novos textos compostos por Cardalda que nos convidan a imaxinar que visión tería do noso século Valle-Inclán.

Con Teo Cardalda na pel de Valle-Inclán e María Monsonís na de Josefina Blanco, “Claves Líricas” ofrece unha radiografía artística do escritor e trasladará ao público a imaxe do mundo como esperpéntico sainete. Tras a estrea en Gondomar o dúo levará este espectáculo, ao amparo do Xacabeo 21-22, ás vilas de Culleredo, Vilanova de Arousa e, por último, á Cidade da Cultura de Galicia.

Máis info en https://taquilla.concellodegondomar.gal