Gondomar “móllase polos ríos” e retira 1.500 quilos de residuos do Miñor e do Zamáns

Un total de 40 voluntarios participaron este domingo en Gondomar na XIV Limpeza Simultánea “Móllate polos Ríos”, incluída no “Proxecto Ríos”, coordinado pola asociación ecoloxista Adega. Trátase dun programa de educación e voluntariado ambiental que ten a finalidade de dar a coñecer o importante papel dos cursos fluviais, mostrar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación.

O Concello de Gondomar uniuse un ano máis para retirar nesta ocasión un total de 1.500 quilos de residuos das ribeiras e do leito do río Miñor e a desembocadura do Zamáns, con punto de encontro ás 10:00 da mañá na Ponte das Ánimas. Os voluntarios e voluntarias recibiron máscaras, unha camiseta conmemorativa do evento, bolsas e luvas, así como unha pequena merenda, ofrecida polo Concello, ao final da actividade.

Desde a Concellería de Medio Ambiente sublíñase a importancia destas accións como un elemento fundamental para a educación e sensibilización ambiental dos cidadáns. “A pesar dos avances logrados nos últimos anos e a mellora da calidade dos nosos ríos, queda moito traballo que facer”, afirma o edil Brais Misa, quen lembra que nese camiño continuará actuando o goberno local.