Os Círculos de Podemos do Val Miñor pídenlle aos seus Concellos un plan de ocio libre de LGTBIfobia

Os Círculos de Podemos do Val Miñor veñen de presentar unha moción para traballar no desenvolvemento dos dereitos das persoas LGTBI e por un Val Miñor libre de LGTBIfobia. Con isto pretenden a implicación do conxunto de actores e veciñanza para frear o número crecente de agresións e vandalismo por motivos de LGTBIfobia.

“A loita contra a LGTBIfobia require do traballo conxunto das distintas institucións xunto a colectivos e veciñanza, por iso pedimos o respaldo das corporacións de Baiona, Nigrán e Gondomar a unha serie de medidas que van encamiñadas a dar unha resposta colectiva contra a LGTBIfobia”, apuntan desde a formación morada.

Esas medidas van dende o deseño dunha campaña para un ocio libre de LGTBIfobia, en colaboración coas asociacións de hostaleiros, ata a creación dun punto de información LGTBI municipal ou distintas iniciativas en colaboración cos centros de ensino, posto que a educación é clave para erradicar a LGTBIfobia e máis cando falamos de que algúns destes actos violentos teñen como protagonistas a xente nova.

Ademais, Podemos pide que a Xunta de Galicia se involucre poñendo os recursos para desenvolver de maneira axeitada a Lei 2/2014 pola igualdade de trato e a non discriminación de lesbianas, gais, transexuais, bisexuais e intersexuais, que lle dea impulso ao Observatorio galego contra a discriminación por orientación sexual e identidade de xénero para que sexa unha ferramenta eficaz e que, en diálogo cos colectivos LGTBI, redacte unha Lei Trans Galega.