O Concello de Nigrán acolle esta fin de semana a fase previa do Campionato de España de Tripletas en Porto do Molle con preto de 250 deportistas de toda Galicia divididos en 65 equipos de categorías sénior feminina e masculina (primeira e segunda) e xuvenil. O C.C.D. Bolos da Carrasca, de Nigrán, é a única entidade clasificada da comarca con tripletas sénior masculino e feminino.
Para esta cita, o Concello de Nigrán habilitou 40 canchas en terreos ao carón do Edificio Tecnolóxico e a competición desenvolverase simultaneamente durante todo o sábado e domingo desde as 9:30 ás 13:00 e de 16:00 a 20:00 horas. Disporase de cantina con refrixerio e tapeo.
Mediante esta fase previa en Galicia clasificaranse para a fase final do Campionato de España de Tripletas o 10 e 11 de setembro tamén en Porto do Molle unha praza de feminina sénior primeira, tres de masculino sénior primeira, tres de masculino sénior segunda e unha de xuvenil.
“Nigrán, grazas a Bolos da Carrasca, é unha localidade recoñecida en toda España pola práctica da petanca. Esta cita para nós é tamén un ensaio xeral para o campionato final que acollemos en setembro, cando nos visitarán equipos de España, Francia ou Suíza”, explica o alcalde, Juan González.
