Con motivo do Día Nacional do Donante de Órganos que se celebra hoxe, a Oficina de Coordinación e Transplantes do Complexo Hospitalario Universitario de Vigo deu a coñecer os datos de actividade do pasado ano 2020.
Así, a pesar da pandemia da Covid19, acadouse manter uns niveis de actividade moi aceptables, rexistrando un total de 20 doadores de órganos, 9 menos que o ano anterior. Destes doadores extraéronse 69 órganos (4 corazóns, 14 fígados, 13 pulmóns e 38 riles) e 44 tecidos (córneas, osos, tendóns, segmentos vasculares).
Segundo afirma o coordinador de transplantes do CHUVI, Lucas Lage “ nos primeiros meses do confinamento a actividade reduciuse dun xeito moi significativo. Este descenso dos doantes ven condicionado polo menor número de ingresos de patoloxías que producen potenciais doadores como os ictus ou os traumatismos, así como polo incremento das esixencias na selección de doadores. Sen embargo, ao final do ano rexistrouse un repunte, polo que conseguimos pechar o exercicio cuns datos moi aceptables, superando as nosas expectativas”.
No referido a actividade transplantadora, no Complexo Hospitalario Universitario de Vigo foron implantadas 27 córneas e 5 membranas amnióticas. Ademais, realizáronse 44 Transplantes de proxenitores hematopoiéticos (médula ósea).
O 27% das tarxetas de doadores de Galicia son de Vigo
A dia de hoxe a área de Vigo conta cun total de 32.532 persoas con tarxeta de doador (o 27,4% das tarxetas totais de Galicia). Este dato é posible grazas aos equipos de profesionais como ás Asociacións dedicadas a este tema, entre as que cabe subliñar a impresionante labor de Adrovi e Alcer.
