Aitana Pérez, do Monte Real Club de Yates de Baiona, prata no Trofeo Vithas de Optimist

Miguel Rodríguez Tábara do Club Marítimo de Canido proclamouse na tarde do domingo vencedor absoluto do Trofeo Vithas de Optimist celebrado na ría de Vigo. O Sub16 vigués é actualmente o número 2 da Clasificación de Galicia, e logrou relegar na proba de peche ao optimista do Club Náutico Deportivo de Riveira Bruno Iglesias á cuarta praza, completando o podio final Martínez Mijares e Pepa Bermúdez de Castro, ambos os dous do Equipo de Regatas Abanca do Real Club Náutico da Coruña.

O evento que organiza o Marítimo de Canido, aspira a converterse nun referente a nivel ibérico, celebraba a súa clausura na tarde do domingo, que contou coa presenza do concelleiro vigués de deportes Manel Fernández.

Mal pintaban as cousas á primeira hora da mañá en Canido: choiva e nin pinga de vento… malos condimentos para cociñar unha boa regata. A situación tardou moito en cambiar, pois a frota recibía orde de facerse á mar, cando case ninguén apostaría que se ía a celebrar proba algunha.

A paciencia e profesionalidade do que é un dos mellores xuíces galegos: o arousán Juan José Durán, foi decisiva cando pasaban sete minutos das dúas da tarde, pois soaban as bucinas dos xuíces co sinal de comezo da que sería a segunda e definitiva manga.

Ventos de 7 nós do nordeste acompañaban á frota, logrando o primeiro posto Miguel Rodríguez Tábara, sendo a segunda praza para a mellor optimista do Monte Real Club de Yates de Baiona… Aitana Pérez, o que lle valía para ser a prata entre as mozas, sendo soamente superada pola coruñesa Pepa Bermúdez de Castro (filla do patrón da Volvo Ocean Race, Chuny).

Quen non anda fina era a número uno da Clasificación feminina: a pontevedresa do Real Club Náutico de Sanxenxo, Natalia Domínguez que baixaba ata a sexta praza, produto dun décimo posto nesta segunda manga; o que provocaba que a gran favorita se tivese que conformar co bronce entre as mozas.

Tamén é preciso resaltar os coruñeses Jaime Sánchez e Pedro Núñez, que lograban meterse no top ten, así como Jorge Costas do Real Club Náutico Rodeira e o vigués do Canido Vithas Team, Fernando Campos. En canto á potente frota do Real Club Náutico de Vigo, os seus mellor optimistas eran Mencía García e Paco Riveras… sendo Marta Torres do Grupo Bazán de Ferrol, a mellor posicionada da numerosa frota de Ferrolterra.

TROFEO VITHAS DE OPTIMIST – Clasificación Final (20 primeros)

1º MIGUEL RODRIGUEZ (CM CANIDO), 6-1= 7 puntos
2º MARTIN MIJARES (RCN LA CORUÑA), 2-6= 8
3º PEPA BERMUDEZ DE CASTRO (RCN LA CORUÑA), 5-3= 8
4º BRUNO IGLESIAS (CND RIVEIRA), 1-8= 9
5º AITANA PEREZ (MRCY BAIONA), 11-2= 13
6º NATALIA DOMINGUEZ (RCN SANXENXO), 4-10= 14
7º JAIME SANCHEZ (RCN LA CORUÑA), 9-5= 14
8º JORGE COSTAS (RCN RODEIRA), 7-9= 16
9º PEDRO NUÑEZ (RCN LA CORUÑA), 12-7= 19
10º FERNANDO CAMPOS (CM CANIDO), 8-18= 26
11º PABLO MARQUINA (MRCY BAIONA), 14-16= 30
12º DANIEL PAZ (RCN RODEIRA), 3-31= 34
13º ANA COSTAS (RCN RODEIRA), 22-13= 35
14º EMMA CHAMORRO (CM CANIDO), 16-19= 35
15º MENCIA GARCIA (RCN VIGO, 26-12= 38
16º PACO RIVERAS (RCN VIGO), 15-23= 38
17º RODRIGO PEREZ (CM CANIDO), 17-22= 39
18º MARTINA ALONSO (CM CANIDO), 20-21= 41
19º MARTA TORRES (BAZAN FERROL), 32-11= 43
20º MARTIN MONTES (MRCY BAIONA), 13-30= 43